КЫДЗ

Ӧшинь улын быдмис кыдз. Быдмис дыр. Весиг ачыс Ӧксинь пӧч вунӧдіс, кор садитліс еджыд кока пусӧ. Унаысь воліс тулыс да ар, сотліс шонді да усьлі лым. Кыдз сӧвмис-нюжаліс, а Ӧксинь — пӧрысьмис. Пӧчлӧн кос чужӧм вылас содісны чукыръяс, а быдтасыслӧн петісны пыр унджык и унджык выль вожъяс.

Пашкыр мича пу! Тулысын сійӧ вежӧдас, кудритчас, арнас жӧ пу дорысь бобувъяс моз лэбзясны вижӧдӧм-косьмӧм коръяс.

Ӧксинь радейтіс аслас киясӧн садитӧм пусӧ. Гажа тувсов рытъясӧ частӧ петавліс сы дорӧ. Пуксяс ляпкыдик джек вылӧ, шойччӧдыштас мудзӧм лы-сьӧмсӧ, казьтыштас ныв-пиянсӧ, кодъяс лэбачьяс моз разӧдчисны чужан позйысь.

Дивъя ӧні пӧчлы шойччыны: челядьыс быдмисны, почтальон быд тӧлысь гортӧдзыс вайӧ пенсия. Кургӧ-олӧ, пӧт и шуда. Да и посёлокса том йӧз радейтӧны гажӧдчыны кыдз улын. Мукӧд дырйи вой шӧрӧдз пукаласны, сьыласны. Пӧрысь морт оз дӧзмы, ачыс коркӧ вӧлі том.

Со и талун пӧч петіс шойччыны. Эз на удит матыстчыны пу дорӧдз, кынмис места вылас. Кыдзлысь чорыд кучиксӧ кодкӧ вундалӧма, розьӧдлӧма, пу сьӧмӧсысь шорӧн визувтӧ синва. Пӧч уськӧдчис, рана вылас пуктіс ичӧтик кисӧ, сьӧлӧмыс тыри ыджыд скӧрлунӧн.

Бӧрдіс кыдз, бӧрдіс Ӧксинь. Вӧсньыдик сой вылас войталісны сӧдз синва войтъяс. Эз, нинӧмӧн эз вермы отсавны пӧч доймӧм пулы. Сійӧ весиг эз тод пакӧститчысь мортсӧ, коді ӧти лунӧн вӧчис кык дой: чӧла сулалысь кыдзлы да пӧрысь Ӧксинь сьӧлӧмлы.