МЕДВОДДЗА НАГРАДА

Афанасийлӧн вокыс, Степан Сизов, мӧдӧд во нин служитіс гранича вылын. Быд пӧрйӧ, кор ылі мусянь воліс воксяньыс письмӧ, Афанасий дыр лыддьывліс сійӧс. Степан быд письмӧын гижліс, мый олӧ бура, служба нуӧ аслас ёртъясысь не омӧльджыка. Командиръяс радейтӧны сійӧс. Гранича вылын лӧнь. Сэсся гортсаясыслысь ёнджыка юасис сиктын олӧм-вылӧм йылысь. Письмӧ помас гижліс бать-мамыслы, тӧдсаяслы пӧсь чолӧм, тшӧктіс Афанасийӧс велӧдчыны бурджыка, кывзысьны учительяслысь.

Лыддяс вӧлі Афанасий татшӧм письмӧсӧ и пыр жӧ гижас вокыслы письмӧ. Мый сідз и сідз... Гортын ставыс лючки-ладнӧ. Бать уджалӧ пыр на скӧтникӧн да пастукӧн, мамныс дояркаалӧ. Велӧдчӧ пӧ ачыс «нёль» вылӧ.

Письмӧсӧ гижигӧн Афанасий частӧ юасьліс вокыслысь:

«Кутін эн на кӧть ӧти шпионӧс? Менсьым другъяс пыр юасьӧны, а ме немтор ог вермы висьтавны. Гиж ӧдйӧджык та йылысь, муса вок Степанушко, да сӧмын меным. Юӧрт ещӧ, эм абу тіян сэні пограничнӧй понъяс? Абу кӧ, ме верма быдтыны. Сідз велӧда, мый любӧй шпионӧс да диверсантӧс кутас. Сета пионерскӧй кыв».

Быд письмӧ гижӧм бӧрын Афанасийлы дум вылас усьлывлі вокыс. Степан Армияас мунтӧдз уджаліс лесопунктын, вӧр пӧрӧдіс. Пыр лыддьывлісны бур уджалысьӧн. Газетъясын Степан йылысь эз этшаысь гижлыны и.

Эз на коль и кык во, кыдзи вокыс ӧти арся лунӧ муніс армияӧ, а Афанасийлы кажитчӧ, мый Степан некытчӧ эз мун. Вот рытнас локтас удж вылысь, ужнайтас, босьтас киас баян да мӧдас сьӧлӧмсяньыс ворсны, кыдзи ворслывліс водзджык.

Кутшӧм гажа сэки вӧлі гортас! Афанасий пуксяс вокыскӧд орччӧн, синъяс мудзтӧдзыс видзӧдас, кутшӧм зіля котралӧны Степанлӧн чуньясыс баян клавиша кузя. «Мыйӧн быдмышта, ачым велӧдча ворсны, — мӧвпалӧ Афанасий. — Сӧмын тай батьӧ шуӧ, мый ме зэртӧм воын чужлӧма, ляк бадь моз надзӧн быдма».

Афанасий велӧдчис нин нёльӧд классын, но тушанас и збыльысь вӧлі ичӧт, классас весиг дзоля Афонькаӧн нимтісны. Но котралігъясӧн, уджалігӧн сійӧ эз кольччыв и ас дорсьыс ёна гырысьджык да ёнджык зонкаясысь, нывкаясысь и.

Вокыслы бӧръя письмӧсӧ мӧдӧдӧм бӧрын регыд заводитчисны гожся каникулъяс. Водз асывсянь сёр рытӧдз Афанасий отсасис батьыслы: видзис пӧскӧтинаяс вылын совхознӧй фермаысь мӧсъясӧс. Кӧть асныра сюрукъяс, гӧрданьяс лунтырнад ёна мудзтылісны детинкаӧс, но сійӧ эз норась. Котралас пӧттӧдзыс мӧсъяс бӧрся, воас гортас да став мудзыс бырӧ. Рытъяснас другъяс дорас на ветлас.

— Колӧкӧ, Степан вокӧй кутіс нин шпионӧс? И мый сы дыра письмӧсӧ оз гиж. И пон йывсьыс немтор эз юӧрт? — норасис сійӧ другъясыслы вокыс вылӧ, кӧть думъяснас и гӧрдитчис, мый сійӧ видзӧ гранича.

«Мыйла ме ичӧт? Вӧлі кӧ вокӧ арлыда, колӧкӧ, гранича вылын жӧ ӧні служиті. Важӧн эськӧ куті шпионтӧ», — гуся мӧвпъяс волісны детина юрӧ.

Афанасий ворсыштас другъясыскӧд регыдик, сэсся котӧртас гортас. Аски ӧд сійӧс бара виччысьӧ удж. Батьыс оз радейт прӧста олысьястӧ. Дыш мортыдлӧн пӧ юрас тойяс вермасны чужны. Уджыд пӧ миянӧс вердӧ и пасьтӧдӧ. Государстволы пӧльза вӧчӧ.

Да и аслыс Афанасийлы воӧ сьӧлӧм вылас пастукалӧмыс. Лунтыр ывла вылын. Кор мӧсъяс пӧттӧдзыс йирсясны да водаласны шоналӧм лыа вылӧ, позьӧ купайтчыштны, гӧп гудыртны, шомкор да оз сёйны, гӧрд сэтӧрӧн горштӧ веськӧдны.

Кыдзкӧ ӧти гожся лунӧ пастукъяс дорӧ локтісны совхозса директор да зоотехник. Директор киасис Афанасий батькӧд да мӧдіс ошкыны сійӧс:

— Молодеч, Константинович. Тэӧн видзӧм мӧсъясыд миян совхозын медся йӧлаӧсь. Ог вунӧдӧй старайтчӧмтӧ.

— И месянь зэв ыджыд аттьӧ, Михаил Константинович, — сёрниӧ шыасис зоотехник. — Йӧв лысьтӧм кузя тіян ферманыд медся водзын. Тані, дерт, зэв ыджыд пай и тэнад. Ӧтнад со матӧ сё мӧскӧс видзан.

Пастук видзӧдліс бокын сулалысь пиыс вылӧ да чуньяснас корис ас дінас Афанасийӧс.

— Сьӧкыд эськӧ меным, олӧма мортлы, справитчыны та мында тайтӧнад, не кӧ пилӧн отсӧгыс. Сійӧ быдса тӧлысь нин меным отсасьӧ.

Ӧтпырйӧмоз директор да зоотехник матыстчисны шӧйӧвошӧм Афанасий дорӧ, кытшалісны сійӧс, заводитісны тшӧтш ошкыны детинаӧс.

— Тӧдчӧ, Сизовлӧн пиыс, — нюмъёвтіс директор да ыджыд кинас малыштіс детинаӧс юрӧдыс. — Кыдз шунысӧ, герой?

— Афонька.

— Сідзкӧ, Афанасий Михайлыч... Бур, бур... Велӧдчы уджавны ичӧтсянь. Быдман да, лоӧ тӧлк.

— Помалан школатӧ да батьтӧ вежан. Миянлы ок кутшӧм ёна колӧны велӧдчӧм пастукъясыд. Сэсся ме моз жӧ зоотехникӧн лоан, а гашкӧ и...

Эз на удит зоотехник помавны сёрнисӧ, кыдзи Афанасий вочавидзис:

— Ме гранича вылын кута служитны. Вокӧ моз жӧ...

Ставӧн серӧктісны. А детинка босьтіс веськыд киас плеть и тэрыба котӧртіс веж луд вывті ылыстчысь мӧсъяс бӧрся.

Ошкыштӧм бӧрад тайӧ шоныд да гажа луныс Афанасийлы кажитчис праздник кодь кыпыдӧн.

Эз на коль и тӧлысь, кыдзи Афанасийлысь батьсӧ корисны совхозӧ. Директорыс весиг пастуклы мӧдӧдӧма ассьыс машинасӧ.

Кор Афанасий воис школаысь, батьыс гортас нин вӧлі. Порог дорсянь на ён кияснас шымыртіс писӧ, лэптіс морӧс бердас да пыртіс пыді жыръяс.

— Видзӧдлы, мый стенас ӧшалӧ.

Еджыд краскаӧн мавтӧм неыджыд рама пиын тыдаліс Почёт грамота.

— Тайӧ тэныд, батьӧ? Тэнӧ наградитісны?

— А тэ лыддьы, мый сэтчӧ гижӧма.

Афанасий лыддис ӧтчыд. Тільыштіс синъяссӧ да выльысь мӧдіс видзӧдны. Лыддьӧ и оз эскы аслыс.

— Вот тайӧ да... Коймӧд фермаса медбур пастук Михаил Константинович Сизовӧс да сылы отсасьысь Афанасий Сизовӧс совхозса дирекция, партком да рабочком наградитӧны Почёт грамотаӧн... Ой, батьӧ! Талун жӧ та йылысь Степанушколы гижа письмӧ. Вот любӧыд сылы лоӧ!

— Вокыд ачыс локтӧ. Телеграмма воис. Рытнас гортын нин аддзысян.

Афанасий кутыштіс батьсӧ голяӧдыс, сэсся чеччыштіс джоджӧ да дыр радысла бергаліс. Ачыс вель частӧ кыйкнитлывліс стенын ӧшалысь грамота вылӧ, кытчӧ батьыскӧд орччӧн пасйӧмаӧсь и дзоля Афанасийлысь нимсӧ.

Степан воис сёрӧн нин. Военнӧй паськӧмӧн сійӧ кажитчис картинавывса молодеч кодьӧн. Пырӧмӧн тшӧтш салдат дыр кутліс мамсӧ, коді радысла кывсӧ шуны эз вермы. Сэсся батьсӧ окыштіс да дыр видзӧдіс сы вылӧ, быттьӧ первойысь аддзис сійӧс.

Та бӧрын сӧмын Степан матыстчис Афанасий дінӧ, мыччис сылы кыкнан кисӧ:

— О, да тэ жӧник нин. Ывлаысь кӧ аддзи, эг и тӧд эськӧ. Айда, Афонька. Айда, ичӧт вок!

— А миян батькӧд награда эм, — мӧдіс ошйысьны вокыслы зонка. — Он верит? Со кӧть видзӧдлы.

— Гожӧмбыд жӧ ӧд старайтчин. Шойччӧм ни гуляйтӧм эн тӧдлы, пыр мӧсъяскӧд ноксин, — ошкыштіс Афанасийӧс мамыс.

— Видзӧдлы нин, Степан, награда вылас, — Почёт грамота вылӧ индіс батьыс.

Степан матыстчис стен дорӧ, дыр сэні сулаліс да радуйтчис.

— Зэв тай, сідзкӧ, бур да ладнӧ. Видзӧдтӧ, и Афонькалы награда. Нималысь морт нин. Ме арлыдас воан да, колӧкӧ, орден морӧсад ӧшӧдасны! — ошкис воксӧ салдат.

— А мый... зэв вермас лоны. Зіль да уджач мортыд миян му вылын пыр почётын, — кыліс батьыслысь гӧлӧс. — Кыдз шуасны: медся первой морт.

Сэк кості Степан восьтыліс ассьыс чемодансӧ, перйис сэтысь мыйкӧ да пуктіс пызан вылӧ.

— Менам со эм жӧ награда. Ог весьшӧрӧ казеннӧй нянь сёй. Гранича сюся видзӧмысь наградитісны грамотаӧн да кызь лун отпуск сетісны.

— Шпионӧс кутін? Да... Вот тайӧ герой... — бергаліс вокыс дорын Афонька.

— Эг, шпионӧс ни диверсантӧс эг кут. Ми сідз видзам гранича, мый сэті некутшӧм враг оз вермы вуджны миян му вылӧ.

Афонька пызан йӧрсьыс перйис кнопкаяс, кыкнан кинас босьтіс вокыслысь Почёт грамотасӧ да ӧшӧдіс сійӧс асланыс грамотакӧд орччӧн.