ЖАЛЬӦ МЕНАМ
— Локтін... Ме дыр тэнӧ виччыси, дыр. Эг нин и думышт, мый аддзыла. И мамыд дорӧ он волывлы, а ми ӧд матынӧсь тані, видзӧдлы, некымын воськов и эм... Косьмис сьӧлӧмӧй тэтӧг, жальӧ менам, та мында вонас. Куня синмӧс да гӧлӧстӧ кыла, ме помтӧг дась кывзыны тэнӧ. Мый висьталан, сідз и кара, кыдз тшӧктан овны, сідз и ола. Тэ волывлы сӧмын ме дорам, кӧть гежӧдика, кӧть вонас ӧтчыд. Меным и гажаджык лоӧ, тӧдны кӧ кутча, мый забыль воан, некымын здук бокам сулалыштан. Сэки и кокняммыштас сьӧлӧм вылам, и нюмъявны бара понда. Тэ ӧд радейтлін, кор ме нюмъялі, Матвеюшко, жальӧ менам. А ме и ӧні рад, сэтшӧм рад, мый весиг кывъясӧн шунысӧ ог вермы... Со и матын нин тэ, и сьӧлӧмӧй тірзьӧ, петас со морӧс кудйысь да вевттяс муслунӧй дзоридзалысь, мелі Изьва мунымӧс, ру моз шебралас грездъяссӧ, ю веркӧссӧ... И мыйта эськӧ гажыс му вылас лоас, мыйта кыпыдлуныс... И мамыд кутшӧм рад, кӧнкӧ, аддзыны тэнӧ, дыр жӧ, буракӧ, виччис, места аслыс эз аддзы, кӧні нин жаль пиыс сылӧн, сылӧн Матвеюшкоыс. Ок, тӧдін кӧ эськӧ, кыдз завидьта ме ӧні мамыдлы... Со и петін нин мамыд дінысь, матыстчан... Абу и пӧрысьмӧмыд тэ, сэтшӧм жӧ мича да вылын юра, менам чужан керка бокса пожӧм кодь, сибавны позьтӧм да тшапитчысь. Ӧтиӧс кора сӧмын: эн прӧйдит боктіым, пыравлы, кыдзи уна во сайын пыравлін керкаам, пукавлін бокам, сэтшӧм мелі да матысса, водзӧ олӧм йывсьыным мойдін... Весьшӧрӧ ставыс тайӧ вӧлӧма, но вӧлі ӧд, вӧлі! Матыстчывлы, кора... Сэки и виччысьӧмӧйлы, и шогӧйлы пом воас. Гажтӧм ӧд меным тані ӧтнамлы, ёна гажтӧм. Тэ йылысь мӧвпъясӧн сӧмын и ловзьӧдлі синваысь дзормӧм сьӧлӧмӧс. Пыравлы сӧмын ӧтчыд, сэки и покойыс меным воас, и Енкӧд йитчас коньӧр лолӧй, и мулань личкысь изйыс сьӧлӧм вывсьым мынас... Сэсся ӧд нинӧм оз и ков меным, сэсся нинӧм оз ков...
Матвей матыстчӧ тӧдтӧм гу дінӧ, сувтыштлӧ да вокыскӧд сёрнитігкості чорыдакодь чӧвтӧ:
— Ольгалӧн мӧгилаыс али мый? Пу кресттор тай и сувтӧдӧмаӧсь. Ӧнія кадӧ унджыкыс памятникъяс нин карысь вайӧны. А верӧсыс ӧд районын абу медся гӧль мортыс, ставлы тӧдса.
Матвейлӧн вокыс тшӧтш сувтӧ да тӧждысигтырйи видзӧдӧ сьӧдӧдны заводитӧм крест вылын муртса ӧшалысь фото вылӧ:
— А жалькойд тай вӧлӧма нывбабаыд, бура и жалькойд, нинӧм он шу. А тэ тӧдлін али мый сійӧс, Матвей?
Но Матвей оз нин кыв, сійӧ падъявтӧг петӧ кладбищелӧн йӧр сайӧ да лэччӧ грездлань, сӧмын на садьмӧм юлься шонділы воча.
