ЛЫДДЬЫСЬЫСЬЛЫ ГИЖЫССЯНЬ КЫВ-МӦД ЗЭВ ЗБЫЛЬЫСЬ
Гижи висьтъясӧс, пьесаясӧс, кывбуръясӧс, гижи, да и юрӧ воис: не жӧ век пызан йӧрын видзны, бус падъянас. Колӧ йӧзӧдны, мед мукӧдлӧн джаджъясысь тшӧтш буссӧ чукӧртыштасны. Муні ӧтилаӧ, муні мӧдлаӧ. Вежӧра синма, кык чунь кыза ӧчкиа войтыр (корсюрӧ и ыджыд тошкаӧсь на) кымыныськӧ и юавлісны: мыйла пӧ гижин? Кутшӧм ногӧн да кутшӧм могӧн? А мый татчӧ шуан? Мог менам абу, ни ног абу. Кыдз кужи, сідз и ныри. Окота лои, синва петмӧн окота, шыӧн окота, сьӧлӧм потмӧн окота. Меным ӧд висьталӧны уна, вот и ачым висьтасьышті, мед пытшкын не кутны. Мый артмис, сэсся асьныд лыддьӧй, да эн жӧ ёна дивитӧй. Дерт, эськӧ, кызвыныс петавліс нин ӧти да мӧд журнал-газетын. Пьесаясӧс пуктывлісны фольклор театрын. Но татчӧ шуи чукӧртны ӧтилаӧ, ӧтгудырӧ. Кӧть эськӧ и торъялӧны найӧ ёна ӧта-мӧдсьыс: ыджданас и гижанногнас, каднас и геройяслӧн ӧбичаӧн. Да мед кӧть неуна лададжык лоис, юки гижӧдъясӧс некымын чукӧрӧ.
Шыӧдчи тэ дорӧ, муса лыддьысьысь, гудрасигмоз, но абу шмонитана менам восьтысьӧмӧй. Сэні олӧмас моз ставыс паныдасьлӧ: шогыс и гажыс, бурыс и лёкыс, серамыс и синваыс. Кызвынсӧ ӧд олӧмысь босьтӧма. А олӧмным миян быдсяма. Коркӧ шыльыда шлывган, быттьӧ йи вывті кыза утъялӧм гын сапӧгӧн. Сӧмын на бурас велалан, ныртӧ лэптан, видзӧдан да: крукасьӧмыд-сангысьӧмыд, бур, он кӧ бырӧдӧ ли йӧрданӧ веськав. Оз ӧд ставыс йи вылад шливкъявны петавлыны. Кодкӧ — вала, кодкӧ песласьны, кодкӧ и чери кыйны. Юкмӧсыд тай ставыслы ковмылӧ. Кӧсъян, васӧ ырскӧмӧн ю, кӧсъян, шполькӧдчы сэн бурпӧт. Мый лолыдлы колӧ, сійӧс и вӧч. Ме тай сідз-а.
Корсюрӧ менсьым юавлӧны: ставсӧ пӧ ӧмӧй юрсьыд босьтан? Юрсьыд ми нинӧм босьтны ог вермӧй. Нинӧм сэн торъяыс абу, вемторйысь ӧприч. Кодлӧн юрыс ыджыдджык, кодлӧн дзоляджык, но миян юрӧ йӧрмӧ сӧмын аддзывлӧмыс да кывлӧмыс, вӧр-ва вежласьӧм да вӧвлӧмторъяс. Дерт, и йӧзкост висьтъяс кольӧны кутшӧмкӧ пельӧсӧ. Важсӧ да выльсӧ ӧд мыйтта йӧзыс висьтавлӧны? И быдӧн ас ногыс, ас лов сертиыс, ас таланӧн, ас олӧм вылӧ мыджсьӧмӧн. Бузгӧ олӧмным косьтъяс вывті, шлывгӧ вомынъясӧд, сувтыштлӧ йирӧ-гобльӧгӧ, мед кольӧмсӧ казьтыштны да водзӧ туйвизь бӧрйыны. А ми видзӧдам, кывзам. Тайӧ ю визувсӧ аддзӧм-кывлӧмсӧ ме сӧмын и шыльӧдышті. Лов серти.
