ГОРТ ОЛЫСЬЯС


Ӧтчыд, тайӧ вӧлі пемыд арӧ,
Войков кежлӧ мамӧ муніс карӧ.
И ми гортӧ кыкӧн овны колим:
Ме да ыджыд вокӧй — Толик.
Луннас воккӧд шырӧн-каньӧн ворсім
Ӧта-мӧдӧс дзебасъясысь корсим.
А кор ывла пемдіс, лои гажтӧм.
Шуа воклы:
— Кӧин локтӧ, гашкӧ?
Со тай кильчӧ вылын кок шы кылӧ,
Мый нӧ эськӧ татысь колӧ сылы.
Толик гигзьӧ:
— Тэ тай вывті полысь.
А ме сылы:
— Збыль ӧд кодкӧ воліс.
Каличалі ӧдзӧс, пукті тас.
Котшкӧдчысьӧс вӧтла:
— Мун вай тась!
Вокӧй увгӧ:
— Некодысь ог пов!
Некод абу, повтӧг гортын ов!
Водім узьны, нянь зыр пукті дінӧ.
Ӧдзӧсланьӧ вишка, пемыдінӧ.
Толик шуштӧм мойдъяс мойдны кутіс,
Кыдзи ёма няньлысь шомсӧ шутіс,
Кутшӧм пиньяс, гыжъяс сылӧн ёсьӧсь, —
Коми зонкӧд нырччӧ пырны косьӧ.
Лэчтӧ пуртъяс, арся кӧдзыд войнас
Тайӧ зонсӧ ёма кӧсйӧ сёйны.
Ме жӧ эшкын улӧ дзоньнас пыри.
Эг и тӧдлы, кодыр полӧм быри.
Унмовссьӧма.
Садьми, — вӧлі асыв.
Шонді югӧр вачкӧ ӧшинь тасӧ.
Видзӧда: а дінын Толик узьӧ.
Нюжӧдчӧма менам крӧвать кузя.
Садьмӧді да юалі ме сылысь:
— Мыйла мунін аслад крӧвать вылысь?
Сійӧ меным:
— Кылан шысӧ ӧні?
Видзӧдлам вай, коді ветлӧ сэні.
Босьті нянь зыр, воклӧн киас палич —
Полігтырйи восьтім ӧдзӧс калич.
Гусьӧн кунь-кань кильчӧ вылӧ петім.
Кыйкъялам, но некод абу сэтӧн.
Сӧмын зібйын Толиклӧн кын гач,
Кильчӧ сюръя бердӧ инмӧ — трач.
Толик збоймис, сувтіс меным паныд:
— Ме жӧ шулі, некод абу тані!