СКВОРЕЧ ПОЗ


Кӧть и гажа тувсов лун,
Вашмунӧма шонді.
Ваня гуляйтны эз мун.
Тувъясьны со пондіс.
Мӧлӧт, пила, кӧрттув доз
Кипод улын сылӧн.
Мастеритӧ сквореч поз.
«Тук-тук, тук-тук» кылӧ.
Локтіс сэтчӧ Василёк.
Шуис:
— Позйыд тэнад лёк.
Збыль мӧй весьшӧрӧ дзонь лун
Позсӧ вӧчис сійӧ?
Татшӧм думӧн личкис ун
Крӧвать вылӧ пиӧс.
А кор садьмис, пырысь-пыр
Петіс кильчӧ вылӧ.
Радыс лои морӧс тыр:
Позйын сквореч сьылӧ.