ПӦДАРОК

Тӧрыт рытнас Ваня дорӧ карысь бӧра-водза воліс батьыс. Вайӧма ичӧтик пистолет. Пистолетыс лыйсигас шковгӧ и ствол помас би ӧзйылӧ. Ваня пырысь-пыр ошйысис Лёшӧлы. Лёшӧ босьтіс пистолетсӧ, видліс лыйсьыны, видзӧдліс пытшкӧссьыс лампочкасӧ, коді ӧзйылӧ лыйигас, да шуис:

— Мошнӧй! Ме пӧчлы тшӧкта жӧ ньӧбны, сэсся позяс войнаысь ворсны.

— Кор нӧ ньӧбас?

— Ог тӧд.

— Талун жӧ и кор!

— Тэныд кокни шуны, батьыд ставсӧ ньӧбалӧ да. Менам пӧчлысь он ёна босьт. Пыр жӧ шуас, сьӧм таргайтӧм пӧ сӧмын.

— А ме думышті, кыдз вӧчны, — радпырысь шуис Ваня. — Колӧ пӧчыдлы первойӧн мыйкӧ козьнавны. Меным мыйкӧ кӧ колӧ, век батьӧлы первойӧн пӧдарок рисуйта, сета да сэки нин кута дзайгыны козин йылысь.

— Кыдз ме тайӧс ачым эг гӧгӧрво? — юрсӧ гыжйыштіс Лёшӧ. — Пыр жӧ пета гортӧ да серпасала. Менам бумагаыс эм.

Лёшӧ эз кут нюжмасьны. Сылы телепит лои пистолетсӧ ньӧбны, медым Ванялӧн кодь вӧлі, шковгис да биыс ӧзйыліс. Сійӧ котӧрӧн кайис кильчӧ вылӧ. Пырис гортас, лолыс тырӧма. Пӧчыс юаліс, ошкӧд пӧ паныдасьлін али мый? Лёшӧ сӧмын юрнас довкнитіс: эг пӧ.

Камод вылысь босьтіс бумага лист. Корсис карандашсӧ, но сӧмын сюри шарикӧвӧй ручка. Лёшӧ пуксис пызан сайӧ да заводитіс рисуйтчыны. Пӧчыс весиг шензьыштіс: мый пӧ талун Лёшӧыскӧд лоӧма? Лёшӧ серпасасис. Эз артмы да косьыштіс бумагасӧ, чукраліс да пач водзӧ шыбитіс. Сэсся бара рисуйтіс. Бара косяліс. Та бӧрын коли зэв ичӧтик кабалатор, муртса ки пыдӧссьыс ыджыдджык. Сэтчӧ, Лёшӧ чайтӧм серти, серпасыс артмис. Серпас гӧгӧрыс рочӧн гижис. «Тебе бабушка подарочек не большой. Я льюблью тебя очень сильно. Или ты штото мне купиш, я тебя очень льубльу».

Лёшӧ нӧшта видзӧдліс пӧчыслы рисуйтӧм козинсӧ. Гыжйыштіс балябӧжсӧ. И сылы бара на окота лои мыйкӧ сэтчӧ содтыны. Кабала банладорас нинӧм нин эз тӧр, бергӧдіс бумагаторсӧ да рисуйтіс мышкас пистолет. Уліас, медым пӧчыс тырвыйӧ гӧгӧрвоас, гижис: пистолет. Сэсся нӧшта ӧтчыд видзӧдліс рисуйтӧмторсӧ да мыччис пӧчыслы:

— Баб, тайӧ тэныд месянь пӧдарок.

— Пӧдарок? — чуймис пӧчыс. — Мый ради нӧ?

— Прӧстӧ сідз. Ӧні тэ меным мыйкӧ пӧдарит.

— Ме? — бара чуймӧмӧн юаліс пӧчыс, гижӧдсӧ да рисуйтӧмсӧ видзӧдалігмоз. — Да, тӧдчӧ, бура велӧдчӧмыд школаад, грамотей, а тайӧ нӧ мый, жабаӧс али менӧ рисуйтін?

Лёшӧ гӧрдӧдіс, юрсӧ копыртіс, синъяссӧ дзебигмоз нурбыльтіс:

— Мышкас эм на.

Пӧчыс бергӧдіс бумагаыслысь мышсӧ да гораа лыддис:

— Пистолет.

— Но да, пистолет меным колӧ, — лэптіс юрсӧ Лёшӧ да коран синмӧн видзӧдліс бабыс вылӧ. — Ванялы батьыс тӧрыт вайӧма. Сэтшӧм лӧсьыд!

— Тэ ӧд абу нин ичӧт, коймӧд классӧ вуджин. Дай дыр-ӧ кежлӧ ньӧбан? Оз дыр ов, пыр и жугӧдан.

— Ог жугӧд, бура кута видзны. Сӧмын Ванякӧд войнаысь ворсыштам.

— Пуысь вӧч, ми тай сідз ворслім да пӧрысьӧдз воим. Лавкаысь ньӧбны татшӧмтортӧ — сӧмын сьӧм таргайтны, — кывкӧрталіс пӧчыс.

Тайӧс кылӧм бӧрын Лёшӧ чушкыльтчис. Ас кежсьыс думыштіс, мый весьшӧрӧ рисуйтчис. Ваняыслӧн батьыс со ньӧбалӧ. А менсьым бабӧс абу кокни ылӧдлыны.

Лёшӧ жугыльтчӧмӧн и петіс ывлаӧ, пырис сарайӧ. Джаджйын куйлісны дедыслӧн инструментъясыс: ножовка, струж, мӧлӧт, весиг ас вӧчӧм пу воропа пурт. Пӧльыс кулӧмсянь инструментсӧ некод на абу босьтлӧма.

Лёшӧ видліс чуньнас пуртлысь да стружлысь дорышсӧ. Тӧкӧтьӧ чуньсӧ эз вунды. Босьтіс сарай бокын куйлысь дӧска пом да заводитіс стружитны. Лёшӧ татшӧм уджтӧ вӧчны оз на бура куж да лои ёна мырсьыны. Стружитчигас и Ваняыс локтіс.

— Мый вӧчан? — сарайӧ пыригмоз юаліс сійӧ.

— Он аддзы? Стружитча, пистолет кута вӧчны.

— Сідзкӧ, пӧчыд оз ньӧб?

— Оз. Лавкаысь ньӧбны — сӧмын сьӧм таргайтны, — бабыслысь кывъяссӧ висьталіс Лёшӧ да чышкыштіс ньылӧмсӧ плешсьыс.

Зонка здук кежлӧ пуктыліс стружсӧ, лӧсьӧдыштіс пӧвсӧ да тшӧктіс Ванялы кутыштны, медым оз вӧр стружитігас. Ваня шашаритчис пӧвъяс, но ёнасӧ кутны эз вермы. Пӧвйыс вӧрис, нӧрӧвитіс усьны сарай джоджӧ. Тадзи бура дыр ноксисны. Кыдзкӧ-мыйкӧ сэсся пӧвйыс едждыштіс жӧ. Лёшӧ кинас малыштіс да шуис:

— Оз желлясь, пырала гортӧ да ручкасӧ вая, медым рисуйтны.

Лёшӧ пыркнитіс ас вывсьыс ӧшйӧм стружки чагсӧ да котӧртіс гортас. Сэсся кык друг заводитісны рисуйтны. Видліс серпасавны Лёшӧ, но эз артмы. Ванялӧн тшӧтш эз кажитчы. Медбӧрын Лёшӧ небыдика шлапнитіс юрас:

— Вот бӧбыд, Ваня, котӧртлы пистолетыдла, сы серти вӧчам. Кыдз ме водзджык эг казяв тайӧс?

Ваня вайис пистолетсӧ. Локтігмозыс лыйсис, вежсӧ Лёшӧлысь петкӧдліс. Лёшӧ босьтіс сылысь пистолетсӧ да пӧв вылӧ пуктытӧдз тшӧтш лыйсьыштіс. Сэсся пистолет сертиыс визьйӧдлісны мыгӧрсӧ. Пилитісны да пуртӧн вӧлалісны. Артмис пистолет кодь жӧ, сӧмын оз лыйсьы да биыс оз ӧзйыв.

— Вомнад лоӧ шуавны, лыйигад, — пистолет вылас индіс Ваня.

— Зато оз жугав, — ышӧдіс асьсӧ Лёшӧ да чургӧдіс пистолетсӧ Ванялы морӧсас. — Дізь, дізь.

Зонкаяс петісны сарайысь. Кӧсйисны нин пышйыны улич вылӧ, кыддза рас дорӧ, но кылісны пӧчыслысь гӧлӧссӧ:

— Кодлы нӧ ёгсӧ колинныд, нотӧ, живо уберитӧ!

Лёшӧлы лои косны на чышкысьны. Ваняыс отсыштіс жӧ. Чукӧртӧм ёгсӧ ӧтлаын нуисны пывсян пачӧ.

Кыддза рас дорын зонкаяс сёрнитчисны, коді лоӧ партизанӧн, коді фашистӧн. Лёшӧ шуӧ:

— Ме лоа партизанӧн, киноысь аддзылі, налӧн первойсӧ пистолетыс абу жӧ вӧлӧма. Тэнад лавкаысь ньӧбӧм, сідзкӧ фашиставны ковмас.

— Тадз абу честнӧ! — мӧдіс вензьыны Ваня. — Кодлы окота фашистӧн лоны? Вай ӧчередьӧн, либӧ ме ог ворс.

— Сідзкӧ, ворсам ӧчередьӧн, — сӧгласитчис Лёшӧ.

Зонкаяс ворсісны, дзебсясисны да ӧта-мӧдсӧ лыйлісны пистолетъяссьыс. Пӧсявтӧдз лои, гӧрдӧдӧмаӧсь кыкнанныс котралӧмысла. Сэсся Лёшӧ друг ланьтіс. Сылы кыддза раслӧн лунладорас нем виччысьтӧг паныдасис оз чукӧр. Озъясыс гӧрдӧдӧмаӧсь да пыр жӧ уськӧдчисны син улӧ. Лёшӧ сюйис ӧтиӧс вомас.

— Ваня, лок татчӧ! — чукӧстіс Лёшӧ другсӧ.

Ваня котӧрӧн локтіс да пыр жӧ самасис озъяинад. Чӧскыдтӧ сійӧ тӧдӧ жӧ.

— Мында озйыс, некод на абу веськавлӧма татчӧ! Бабушкалы вотышта жӧ, — шуис Лёшӧ да пистолетсӧ сюйис гач вӧнь костас, мед оз мешайтчы.

— Мыйла? — чуймис Ваня. — Сійӧ жӧ тэныд эз ньӧб пистолетсӧ.

— А сійӧ менам бабушка!

Лёшӧ мӧд ног эз куж гӧгӧрвоӧдны ассьыс кӧсйӧмсӧ. Сы ногӧн тырмӧ и сійӧ, мый пӧчыс сӧмын бабушка. А Ваняыс вотчис да ставсӧ ачыс сёйис, миян пӧ Марпа пӧчлӧн и сідз быдсяма юмовторйыс эм, тӧрыт на пӧ батьӧ вайис.

Лёшӧ гортас воис да пӧчыслы мыччис содз тыр озсӧ. Мукӧдыс эськӧ вайигас лямыштӧмаӧсь, но пӧчыслы озйыс зэв чӧскыдӧн кажитчис. Татшӧмсӧ пӧ эг на сёйлы, аттьӧалігас шуис сійӧ.