МЕДВОДДЗА РАДЕЙТЧӦМ
Менам друг Ваня пукалӧ ӧти парта сайын Машакӧд. Маша миян старӧста. Школьнӧй платтьӧа, еджыд воротника, бобув кодь бантикӧн кутыштӧма шабді юрсисӧ.
Сійӧ, тӧдӧмысь, став зонкалы классын кажитчӧ.
А мем окота, медым сӧмын меным ӧтнамлы нюмъяліс. Ок эськӧ, верми кӧ гипнотизируйтны! Талун история вылын урок чӧж дзорги-видзӧді, дась вӧлі видзӧдласӧн писькӧдны Машалысь балябӧжсӧ. Видзӧда и думысь шуала: «Радейт менӧ, менӧ!..» Муртса партанас эг чеччышт, кор сійӧ бергӧдчыліс да лӧз синъяснас быттьӧ небыда мавтыштіс лолӧс.
— Александр, мый лоин? — казялӧма партаӧн песовтчӧмӧс да стрӧга шуис историчка.
— Нинӧм... — ыпъялысь чужӧмӧс дзебигмоз вочавидзи ме.
Сэсся переменаӧдз эг нин лэптыв юрӧс парта сайын. Ӧбедайтігӧн сӧмын гусьӧн кыйкнитлывлі орчча пызан сайӧ. Школьнӧй столӧвӧйын гоз-мӧд пызан и эм, унджыкыс оз тӧр. Ырскам чай. Ме пукала Ванякӧд. Сійӧ видліс ассьыс чайсӧ да гораа шуис:
— Абу юмов, сакарыс этша.
А Маша, кыдз мем чайтсис, вывті нин меліа видзӧдліс сы вылӧ, нюжӧдчигмоз мыччис дзоля пань:
— На, Ванюш, гудрышт, юмовджык лоӧ.
— Збыль, юммыштіс и эм, — стӧкан пыдӧссӧ бура дыр гирйӧм бӧрын ошйысис другӧй.
А ме и дӧзми налӧн татшӧм меліасьӧмысь. Весиг шуи ас кежысь: «Талун ог нуӧд сійӧс...»
Ми Ванякӧд вӧлі быд лун урокъяс бӧрын ветлывлам менам мам дорӧ отсасьны. Мамӧ видзӧ куканьясӧс.
Картаӧдзыс сиктсянь верст кымын лоӧ. Ветлам лыжи вылын, панласигмоз. Ваня векджык панйылӧ менӧ. Сійӧ статя, ёнпырысь быдмӧ, а менам тушаӧй ичӧтджык, но мускулъясӧй эмӧсь жӧ. Чунь крукӧн кор кыскасям, ог на сетчы друглы. Сылӧн мамыс кувлі, олӧ батьыскӧд, а кызвынсӧ миянын гартчӧ...
Гортӧ школаысь восьлалім кыкӧн жӧ эськӧ, но чӧла. Ваня заводитліс мыйкӧ висьтавны, да ме ӧлӧді: эн, мися, больгы. Торйӧдчигӧн эг сэсся-й нуӧд отсасьнытӧ. А сійӧ ачыс локтіс.
Ведраысь юктӧдам куканьясӧс бӧж йыв сора турун ваӧн. Дзирскӧны найӧ, китӧ дасьӧсь нюлыштны. Гашкӧ, пасибӧ пыдди да. Мам индалӧ, мый вӧчны, кӧть эськӧ ставсӧ нин тӧдам.
— Ванюк, — шуӧ мамӧ, — эн ыджыда босьт турунтӧ, дойман.
«Тайӧ нин вывті! — быттьӧ зі чушкис, сэтшӧма чушис мамлӧн меліасьӧмыс. — Школаын Ванюш, тані — Ванюк. Ас рӧднӧй пиыслы, меным, Ӧльӧксаныс уна-а...»
Забеднӧ лои. Петі картаысь, кватиті Ванялысь лыжияссӧ да тювги кук карта вылӧ. Сэсся карта ӧдзӧс пыр нерышті другӧс.
— Ванюк, кайлы лыжиыдла, но гӧгйыд мед оз вӧрзьы жӧ!
Та бӧрын вежонысь дыр ӧта-мӧдкӧд эг сёрнитӧй. Ваня, буракӧ, нарошнӧ век бергалӧ Маша дорын. Сералӧны, быттьӧ сэтшӧм нин долыд да лӧсьыд налы. Но и мед. Ме абу жӧ тюни пӧв. Верма на и Таняӧс гортӧдзыс колльӧдны.
Урокъяс бӧрын пыр жӧ Маша петіс класс водзӧ.
— Квайт час рытсянь культпоход клубӧ, — пӧся шуис сійӧ, — «Молодая гвардия» видзӧдны. Коді мунӧ, сьӧмсӧ ӧні чукӧрта.
Ме эськӧ и видзӧдлі нин, но интереснӧй киноыс да мӧдысь шуи ветлыны. Матыстчи старӧста дорӧ да колс пукті дас ура парта вылӧ:
— Гиж!
— Тэныд кутшӧм радысь босьтны?
— Шӧрсьыс, — нурбыльті да вешйи бокӧ.
Рытнас клуб ӧдзӧс дорын Маша сеталіс водзвыв босьтӧм билетъяс. Пукси урчитӧм местаӧ, гартла-быгльӧдла билетӧс. Локтіс Ваня, сатшкысис месянь ӧти пуклӧсӧн бокӧджык.
«Вермин и ылӧджык», — лӧгпырысь мӧвпышті ме, но нинӧм эг шу.
А сэсся менӧ быттьӧ токӧн кучкис. Миян костӧ пуксис Маша. Кыв ог вермы шуны, сӧмын сьӧлӧмӧй пӧсь пывсянын моз тіпкӧ. Пель йылӧдз, буракӧ, гӧрдӧді. Бур, мый биыс кусі да киноыс заводитчис.
Регыд мысти Маша кималаснас корсис менсьым киӧс да асланьыс небыдика кыскыштіс. Сэсся йитіс Ванялӧн кикӧд, а выліас ассьыс пӧсь кисӧ пуктіс. Ме ырыштчылі бӧр нетшыштны, но мыйкӧ кутіс...
Тадзи кутчысьӧмӧн и видзӧдім киносӧ.
