ГУСЯСЬЫСЬ

Берег пӧлӧн сулаліс ичӧтик посёлок. Сэні олісны пуръясьысьяс. Ӧткодь выль керкаяссянь Эжвалань видзӧдісны гырысь ӧшиньяс. Посёлокӧс кытшалӧмаӧсь посньыдик вӧр діяс, тыяс, видзьяс.

Водз асывсянь да сёр рытӧдз пуӧ запаньын удж. Кузь бонаяс костӧд дугдывтӧг кывтісны керъяс. Запань горулын тыдалісны гырысь пуръяс, кодъясӧс пароходъяс кылӧдасны вӧр пилитан заводъясӧ.

Шойччан лунӧ ме локті тайӧ запаняс подольникасьны. Мекӧд орччӧн кыйсисны куим детинка: Петя, Жора да Лёня, кодъяскӧд уна вой нин коллявлім ӧтлаын чери кыйигӧн.

Беринӧсь чужӧма вӧсни голяа Петя детинкаяс пиын медся ыджыд. Тупыль кодь кыз Жоралы позьӧ сетны ар дас кык. Гӧгрӧс чужӧма, ёсиник ныра Лёня тушанас и арлыднас медся ичӧт, сійӧ сӧмын на помаліс коймӧд класс.

Петя да Жора кӧрзинаясын куйлісны нин паськыд ляпаяс, нильӧг йӧршъяс, гӧрд бордъяса ёкышъяс. Лёня кӧть быд подольник дорӧ лэдзис рок тыра мешӧкъяс (черияслы сёян), но мыйлакӧ нинӧм на эз шед. Туисыс дзик тыртӧм, сӧмын чунь кузя гурина куйліс сэні.

Вӧлі сёр рыт. Ывлаыс дзикӧдз пемдіс. Вугыръяс самавлыны эз нин тыдав. Ми босьтім нопъяснымӧс, мӧдӧдчим берегӧ. Кыйсян кӧлуйнымӧс колим ваас, а чери кӧрзинаяснымӧс — бона вылӧ.

— Лёня, тэ ӧмӧй кольччан? — шыасис сы дорӧ Петя.

— Быть кольччы, — шогпырысь туис вылас видзӧдліс детинка да бара муніс подольниксӧ видлавны.

Лӧсьыд пукавны бипур дорын. Сьӧд енэжӧ пуркӧдӧ-кайӧ тшын. Билӧн гӧрд кывйыс горша нюлӧ сынӧдсӧ. Таган вылын жваркйӧ-пуӧ чай. А войыс пемыд-пемыд, быттьӧ вевттьӧмаӧсь мусӧ сьӧд нойӧн.

Лёня миян дорӧ локтіс дыр мысти. Чӧдлач тусь кодь лӧз синъясыс долыда ворсісны. Ӧти киас сылӧн тыдаліс туис, мӧдас — ыджыд ёді. Детинкаяс завидьысла акнитісны, кытшалісны Лёняӧс, заводитісны видлавны черисӧ.

— Туисын и ёкыш эм, — тшапа юӧртіс шуда детинка.

Но Петя да Жора котӧртісны нин бона кузя. Колӧ видлыны подольникъяс, гашкӧ, и налы шеді татшӧм жӧ паськыд ёді.

Ме гусьӧникӧн видзӧдлывлі Лёня вылӧ, татшӧм шуданас некор на сійӧс эг аддзыв. Детинка то ёдісӧ весьтнас мерайтӧ, то сьӧктасӧ мурталӧ. А вомыс аслас сідзи и шешъялӧ.

Петя да Жора котӧртісны нин. Муртса удитісны матыстчыны би дорӧ, кутісны видны Лёняӧс.

— Менсьым тай ёкышсӧ гусялӧмыд, — скӧраліс беринӧсь чужӧма Петя.

— Вӧр! Вӧр! — кӧк моз тэрыба шуаліс Жора.

Лёня чужӧм вылысь воши нюмыс, быттьӧ пемыд войыс нюлыштіс сійӧс, синъясыс ыдждісны-паськалісны.

— Кутшӧм ёкыш? Аслым сійӧ шеді, — Лёня кыкнан кинас кутчысис туис бердас, буракӧ, поліс мырддьӧмысь. Ме заводиті бурӧдны том петукъясӧс. Но Жора некыдз эз вермы ланьтны.

— Чайтан и ёдіыд аслыд шеді. Эз, эз, эз... Сійӧс тэ дядя Ванялысь кӧрзинасьыс босьтін.

Лёня копыртіс сьӧд юрсӧ, сэсся надзӧникӧн бӧрддзис. Ме босьті сійӧс киӧдыс, чышкышті синвасӧ. Жаль вӧлі видзӧдны детинка вылӧ.

— Вай жӧ ветламӧй, видзӧдламӧй, коді мыжаыс, — шыаси ме скӧралысь детинкаяс дінӧ, сэсся ӧзті пӧнар да ставӧн мӧдӧдчим бона вылӧ. Петя да Жора восьлалісны водзвылын, Лёня — бӧрын. Пӧнарсянь ылӧдз нюжӧдчис би югӧр, сійӧ югдӧдіс миянлысь туйнымӧс. Кок улын надзӧникӧн дзуртыштлывлісны кос тьӧсъяс.

Кежим шуйгавылӧ, кытчӧ кольлі чери кӧрзинаӧс. Муртса кутім матыстчыны, сэтысь чеччыштіс сьӧд кань, вомас сылӧн тыдаліс вель ыджыд чери. Кань скӧра видзӧдліс миянлань, тӧдӧмысь, жаль вӧлі эновтны чӧскыд сёянсӧ да заводитіс бӧрыньтчыны.

— Ак тэ, югыд бугыль! Кутӧй, кутӧй вӧрсӧ!

Ставӧн уськӧдчим гусясьысь бӧрся. Но кутан ӧмӧй каньӧс. Сійӧ лэдзис вомсьыс черисӧ и, гырыся чеччалігтырйи, воши пемыдас. Видзӧдлі кӧрзинаӧ, а сэні оз тырмы кык чери, медся гырысьясыс, медся чӧскыдъясыс.

— Кань вӧлӧма мыжаыс, а Лёняӧс видід, — шыаси ме чери кыйысьяс дорӧ.

Найӧ тшӧкмуніны-ланьтісны, полісны видзӧдлыны ӧта-мӧд вылас, сэсся матыстчисны другыс дорӧ да ӧтпырйӧ моз шыасисны:

— Прӧстит, Лёня.

— Лёня, прӧстит. Тэ абу гусясьысь.