БЫДӦНЛЫ АСЛЫС КАД

— Пӧльӧ, кор нӧ муяс вылысь став лымйыс сылас? Окота нин веж турун вывті ветлӧдлыштны, — юасьӧ сизим арӧса Тамара дедыслысь.

— Быдӧнлы аслыс кад, — вочавидзис еджыд тошка пӧль. — Чеччан ӧти асылӧ и лымйыс оз ло.

— Пӧльӧ, а мыйла сы дыра пуяс вылын веж коръясыс оз мыччысьны? — бара юасьӧ Тамара. — Кутшӧм эськӧ мичаӧсь сэки пуясыс лоины.

— Быдӧнлы аслыс кад, — нурбыльтіс пӧльыс да видзӧдліс ывлаӧ. — Оз нин ковмы дыр виччысьны. Кузь тӧвсӧ бара на со чужъялім. Гажа тулыс ӧшиньӧ кутіс таркӧдчыны.

— Кор нин шоръясыс мӧдасны ызгыны-визувтны? Меным окота пароход лэдзны, медым ылӧдз-ылӧдз кывтас. Пароход вылас и аканьӧс пуксьӧда, меным сійӧ оз нин ков. Гашкӧ, шорыс оз и мӧд визувтны да?..

— Быдӧнлы аслыс кад. Быд тулыс на шорыс визувтліс, визувтны мӧдас и таво. Да, да...

— А мыйла скворецъясыс ӧнӧдз эз воны шоныд муысь, кодъяс кольӧм во миян садйӧ позъявлісны? Колӧкӧ, эз во сьӧлӧм выланыс скворечникным да мӧдлаӧ позъялісны.

— Сьӧд ракаяс воисны нин вель важӧн. Воасны и скворецъяс. Быдӧнлы аслыс кад.

— Мыйла нӧ, эськӧ сы дыра ю вывсьыс йиыс оз кылав? Меным теплоходӧн окота гуляйтны, — эз сетчы Тамара.

А дедыс бара, кылӧ, шуис сійӧ жӧ кывъяссӧ:

— Быдӧнлы аслыс кад. Быд тулыс на кылавліс йиыд, кылалас и таво. Непременнӧ кылалас.

— Нинӧм тэ он тӧд, пӧльӧ. Ылӧдлан сӧмын менӧ, — дӧзмис нывка дедыс вылӧ да юр вывтіыс шебрасис эшкынӧн.

Ун йывсьыс кыліс, кыдзи войнас кодкӧ дугдывтӧг сяркӧдчис кӧрт листъясӧн вевттьӧм керка вевт вылын. Асывнас чеччис да чуймис: пӧшти став лымйыс сылӧма, мыччысьӧмаӧсь град йӧръяс. Керкабердса град бӧрӧздаӧд ызгӧмӧн визувтіс гудыр шор. Дедыс пукалӧ ӧшинь дорын да нимкодясьӧ ловзьӧм ывла вывнас.

Тамара босьтіс пароход, кодӧс сылы вӧчис дедыс, пуксьӧдіс сэтчӧ ичӧтик аканьсӧ и йӧткыштіс шор шӧрӧ. Визув ва пароходсӧ да аканьсӧ ӧти здукӧн шелӧдіс-нуис водзӧ.

Эз на удит Тамара пырны гортас, кыдзи кыдз пу вылысь аддзис скворец гозъяӧс. Мудзӧмаӧсь кӧть кузь туй вуджигас, пыр жӧ заводитісны кыпыда сьывны.

— Ай да, донукъяс! Ай да, мусаяс! Локтінныд... А менам сэтшӧма нин бырис тіянысь гажӧй, — сёрнитіс нывка сьӧд лэбачьяскӧд.

Колис ещӧ кымынкӧ лун, Эжва да Сыктыв юясысь кылаліс став йиыс. Юяс кузя бара кутісны ветлӧдлыны ӧтарӧ-мӧдарӧ теплоходъяс, катеръяс.

Сэсся пасьтӧм пуяс вылын мыччысисны посньыдик веж коръяс.

— Со ӧд менам пӧльӧй кутшӧм сюсь да гӧгӧрвоысь. Ставыс лоис сы ног, — дивуйтчис ас кежас Тамара. — Кымынысь тай висьтавліс, быдӧнлы пӧ аслыс кад. Сідзи и лоис. Оз, пӧльӧй, вӧлӧмкӧ, оз пӧръясь.