ВОЙВЫВСА ПУЯС СОЧИЫН

Надежда Васильевна уна во чӧж оліс да медикаліс Сыктывкарын. Тайӧ карас жӧ сійӧ помавліс фельдшерско-акушерскӧй школа.

Гожӧмъяснас сылӧн пыр вичмыліс кад аддзысьлыны татчӧс вӧр-ваыскӧд. То тшак вотны ветлас, то пувъя да чӧдъя местаяс видлас. Рытъяснас прӧйдитчывлі карса уличаяс кузя да синъяссӧ эз вештыв коръя пуяс вылысь, кодъяс надзӧникӧн кышӧдчылісны тӧв ворсӧдчӧм улын.

Олӧмас артмис сідз, мый Надежда Васильевналы ковмис мунны Сочи карӧ. Уджавны тані кутіс. Верӧсыскӧд керка аслыныс ньӧбисны. Пуяс да дзоридзьяс ӧшинь улас пуктісны. Войвылын серти лунвылад, дерт, шоныд и лӧсьыд. Ов да выв сӧмын, мед дзоньвидза вӧлін-а... И чизыр тӧвъяс оз дӧзмӧдны, а тӧлыс абу миянын кодь кузь да кӧдзыд. Гажа карын дивъя овныд. Курортъяс вылӧ быд пельӧссянь татчӧ йӧзыс локтӧ, кутшӧм сёрнияс сӧмын он кывлы. Уличаяс пӧлӧн мича пуяс быдмӧны. Уна пӧлӧс кустъяс гажӧдӧны асланыс мичлунӧн карса олысьясӧс да шойччӧны воӧм йӧзыс. И мореыс дзик орччӧн. Купайтчы кӧть гожъяв.

Уна во нин коли, кыдзи Надежда Васильевна янсаліс войвывкӧд. Но сэтчӧс местаяссӧ, важ тӧдсаяссӧ вунӧдны некыдз эз вермы. Вӧтӧн весиг волывлӧ тӧдса парма-ягъясӧ, пувъя да тшака местаясӧ. Син водзас тшӧкыда волісны видзьяс вылын быдмысь еджыд кыдзьяс, вӧсни кока пелысьяс, пушкыр льӧм пуяс.

Сьӧлӧмыс мӧдіс майшасьны, чуксаліс туйӧ. Окота вӧлі выльысь волыны войвывса карӧ, кӧні Надежда Васильевна колляліс медбур вояс.

Вӧлі водз тулыс на, кор Сочиса гӧстя воис Сыктывкарӧ. Кар ёна вежсьӧма, ӧдва и тӧдан сійӧс.

Надежда Васильевна гӧститіс кымынкӧ лун рӧдняяс да тӧдсаяс ордас, сэсся мӧдіс лӧсьӧдчыны бӧр туйӧ. Быд сикас гӧстинечтӧ вӧзйисны сылы, но нывбаба немтор эз босьт, меным пӧ и сідз унатор колӧ нуны.

Кор тӧдсаясыс локтісны аэропортӧ колльӧдны гӧстяӧс, аддзисны татшӧмтор: целлофанӧвӧй мешӧкын сулаліс куим посньыдик кыдз, сэтшӧм жӧ посньыдик льӧм да пелысь пуяс, кодъяс абу на удитӧмаӧсь лэдзны коръяснысӧ.

Он-ӧ нин Сочиад этайӧясӧс ну, Надежда Васильевна? — юаліс кодкӧ.

— Буретш сэтчӧ. Пукта тайӧ пуяссӧ аслам керка дорӧ и кута быдтыны-дӧзьӧритны. Найӧ меным кутасны казьтывны войвывса кар, тӧдсаяс да рӧдняяс йылысь, кодъясысь ме ола ылын... Тайӧ пуяс дінсьыс кутас ӧвтны чужан муӧн, коді мортыдлы медся муса да колана, — вочавидзис Сочиӧ мунысь ань.

* * *

Вежон кык мысти, кыдзи муніс Надежда Васильевна, Сыктывкарӧ сысянь воис письмӧ. Сэні вӧліны и татшӧм кывъяс: «Вои бура. Тіянысь вайӧм пуястӧ садиті ставсӧ. Лэдзӧны нин найӧ коръяс. Чайта, быдмасны-сӧвмасны».

— Медъя! — шуам ми. — Сідзкӧ, войвывса пуяс кутасны быдмыны и Сочиын.