КОСЛУН

Важӧн кослунъяс дырйиыд коми войтырыд эз сёйлыны яя-выя, йӧла сёян. Тшак ва, зыртӧм кушман, паренча да мый да нуръясянторйыс вӧлі. Сійӧ кадся кослуныд да ульлуныд ӧнія йӧзлӧн вунӧма нин. Мый эм керкаад пунытӧ-пӧжавнытӧ, сійӧс и сёян. Деньгасьыд кор топавлан, сэки кослунъяджык сёян-а.

Но ӧні выль пӧлӧс кослун лӧсьӧдісны ёна вина радейтысьяслы. Дерт, унджык войтырыс ошкисны тайӧ зэв туяна законсӧ. Но ыджыд шогӧ усисны сідз шусяна ульлун радейтысьяс. И кутісны найӧ корсьны тайӧ лэчсьыс петан туй. Тӧлкаджык войтырыс шуисны, тадзи пӧ и миянлы колӧ. Но ты-мускӧдзыс кӧтасьӧм мортыдлы ёна деливӧ лои. На лыдысь ӧтиӧн вӧлі Логинов Ладимер. Сиктса ногӧн кӧ, Лагун Ладимер. А син саяс прӧстӧ Лагунӧн шуисны. Дженьыд и кокньыд шунысӧ. Да и олан сямыслы лӧсялӧ. Бӧръя дас вонас кодкӧ кӧ сійӧс аддзис эськӧ садь юрӧн, эз и эскы. А вермас лоны, и мӧд морт пыдди мӧвпыштіс, воча вокыс пыдди, коді карын олӧ.

Вӧскресенньӧ асылӧ Ладимер садьмис водз. Юрас шувгис пожӧма вӧр. «Шойччан лун кузя талун и вина лавкаыд оз уджав. Нинӧмӧн юртӧ веськӧдны. Но и олӧм воссис», — мӧвпаліс сійӧ шога. Тӧрытъясьыс войт абу кольӧма. Гӧтырыс нистіс-узис орччӧн крӧвать вылын. Банйӧм булки кодь. Оз, майбырӧйлӧн, юрыс вись ни сьӧлӧмыс гудрась. Вина сійӧ эз ю да и гортас эз видз. Нинӧм пӧ Лагунӧс вельмӧдны, сідз нин удж вывсьыс век нёль кокӧн локтӧ. Сизим удж нин вежліс. Кӧсйӧ нин вӧлі бурдӧдчыны мӧдӧдны, да друг со законыс чорзис. Надея да эскӧм чужис Лагун гӧтырлӧн. Ӧд и сылы нин мужикыслӧн нимтысян кывйыс кӧвъясис.

Кослун кӧть абу-а, кӧш ва троньӧбтіс Ладимер, а сэсся котӧртіс-петіс кильчӧ вылӧ. Сэні сійӧс сэтшӧма гугӧдіс. Чайтіс, мый сьӧлӧмыс вомӧдыс петас. Сэсся арся ыркыд сынӧдсӧ морӧс тырнас лолыштіс, и лоис кокниджык. Таво лымйыс усис октябрас нин, да вӧлі дзик тӧв кодь. Пуяс гыӧраӧсь. Асъя ывлаыс руа.

Важӧн пӧ тай тагъя сур вӧчлывлӧмаӧсь, — ӧтчыд казьтыштіс гӧтырыслы да не рад лои и вомсӧ восьтлӧм вылӧ. Петкӧдла пӧ ме тэныд сэтшӧм сур, мый плешкад каяс ыджыд сюр. Век жӧ Лагун радейтіс Марьяӧс, некор эз печиктыв и паныд кыв эз шулы. Но сійӧ зэв бура тӧдіс, мый сылӧн суседыс, Каллян Мӧсей, гусьӧн вӧчӧ кутшӧмкӧ брага. Ӧтчыд на ошйысьліс гылыдмӧм кывнас, менам пӧ брагаӧй виас любӧй врагӧс. Смерть немецким оккупантам пӧ да и всё.

Петавны кӧ-а сы дорӧ? Сэсся тшайпод кежсьыс куш майка вылас пинжакӧн и довзьӧдіс дзӧран ки-кокнас. Мӧсей эз нин узь. Чужӧмыс удитӧма нин шылявны, синъясыс мавтӧм сӧчӧнъяс кодьӧсь. Варова и видзаасис Ладимеркӧд. Лок нӧ пуксьы пызан саяс, чукырӧсь чужӧм-рожатӧ тшӧтш шыльӧдышт. Миянлы пӧ кослуныд — тшаква. Сідзи пӧ небзьӧдчам да кӧтӧдам горшъясӧс, мый вежонӧн он пыдзырт. А сэсся кисьтіс стӧкан тыр кутшӧмкӧ зелля, код помысь збыльысь ӧвтіс враг дукӧн. Смерть-смертьӧн, а враглы али кодлы, он на и тӧд. Гашкӧ, ачыд верман чергысьны татшӧм добрасьыд. Чеччан да кын. Он и тӧдлы креста йӧрад гургасны. Но век жӧ Ладимер, ловсӧ ас пытшкас кутӧмӧн, гулькнитіс стӧканӧ кисьтӧмторсӧ. Здук мысти морӧспань улас кутіс югрӧдлыны. Шоныд и лӧсьыд лои мортыдлы. А сэсся, мый йылысь варовитісны, кыдзи колис луныс, сійӧ оз и помнит. Садьмис, восьтіс синъяссӧ — дзурс пемыд. Ӧтарӧ кисӧ вештыштны кӧсйис, пу стенӧ веськаліс. Вывлань лэптіс кисӧ — бара пӧтӧлӧк ли мый ли. Юрыс тшӧтш мыйӧкӧ чорыдӧ ликмӧма. «Царствие небесное!» — сӧмын вирдыштіс юрас. Сэсся лёкгоршӧн горӧдіс повзьӧмысла. Сійӧ зэв бура тӧдіс, мый кулӧм мортъясыд оз горзывлыны, да код тӧдас, гуалӧм бӧрас, гашкӧ, и овлӧ сэтшӧмторйыс.

Сэсся друг югыд лои. Электрическӧй лампочка ӧзйис. Лагун куйліс пу крӧвать улын сійӧ жӧ тшайподнас да дӧбельки нин няйтчӧм-чукрасьӧм пинжакнас. Гӧтырсьыс-ӧ дзебсьыны сэтчӧ пырис али юр вежӧрыс нин эз уджав, кытчӧ колӧ водны мортлы: крӧвать вылас али улас. Но та бӧрын вунӧдіс туйсӧ Ладимер дӧвеч друг дорас. Весиг ульлунъясыд сылы веськодьӧсь кутісны лоны. Мӧдар югыдас пӧ мунны некор на абу сёр. А таладор светас олігӧн колӧ кывны да аддзыны ставсӧ. Нинӧмла кадысь водз шондісӧ кусӧдны. Лагун гӧтырӧс ӧні Ладимер Аннаӧн шуӧны, а мӧдсӧ сӧмын Ладимерӧн.