ВАБЕРГАЧ ЙИР ДА САРИДЗ ВА ГЫ
Европа му шӧрын вабергач гартыштчис… (артмыштіс ичӧтик бӧжалысь пелысӧн сынӧмысь).
Бергӧдчис вабергач пӧв-мӧдысь — джумкъясис; коймӧдысь — паськалі, джудждаммис.
Вабергач бергалӧ, ӧтарӧ ыдждӧ: кыскӧ кытш пиас чагторъяс, пыжъяс, кывтысьяс пуръясӧс бергӧдлӧ, гартӧ да сюйӧ йир пыдӧс гуранас. Сунӧны-пырӧны улӧюр матіті кывтысьяс. Ыліті, пӧлӧныс, кӧрӧван-пурйӧн кывтысьясӧс вӧрӧдӧ тшӧтш…
Вабергач бергалӧ дыр — ӧтарӧ джудждаммӧ пыр… Ок, джуджыд и гураныс лои! Медджуджыд гӧраяс му вылас саяліны-вӧйины. Вӧйины юр вывтіныс Карпатъяс, Альпыяс… Арарат чурк йывъяс ва улын лоины. (Ной ковчег, вӧлі кӧ, эз вермы сувтнысӧ). Дыр сідзи вабергач бергаліс-бузгис. (Уна, ок, уна и мыжатӧм лов босьтіс сійӧ, гурансӧ тыртіс да суктіс).
Петӧма, ветлӧ му пасьта йӧз пӧвсті орт… (Оз тай ков «майбырлы» горт! Кытчӧ морт ловтӧ суас — сэтчӧ и шойторсӧ дзебас). Петӧма ветлӧдлӧ: зяткӧ-гольӧдчӧ мерлина лыяснас… Ветлӧдлӧ, шенасьӧ-ӧвтчӧ кузь пуа косанас, ылысь судзлалӧ вильӧдӧм сойяснас… Зывӧк… Ордлыыс жервидзӧ — тыдалӧ пырыс. Лы-йӧзвиясыс дзуртӧны кӧрт сімӧм дзир моз… Ветлӧдлӧ, шырӧ йӧзсӧ турунӧс моз… Кодарӧ шеныштас — сэтӧні эрд воссяс. Кытчӧ лолыштас — сэтӧн и тӧв лыбас (шутьлялан-ойзан эрд вылын кольӧ, морт дзебан кывйӧн лыддьӧдлӧ-лывгӧ…).
Вабергач дыр на бергаліс-бузгис. Вабергачсӧ вӧчысьяс, ковчег-пурйӧн веськӧдлысьяс, кужтӧм бӧжалысьяс асьныс кольмӧмаӧсь, оз кужны и кӧсйыны петкӧдныс вабергач кытш письыс. (Мый — налы и ов! Сыннысӧ-пӧсявныс оз налы ков!) Пуксьӧдлам ноко руль дорас сынысьяс пӧвссьыс! Унанад кыдзи тай сыныштасны мӧдарӧ! — Вабергач пасьмунӧ-жугалӧ!.. Ковчег бӧжын веськӧдлысьяс ылӧ тутісны пыж бӧжысь улӧ юр, вылӧ кок йир пыдӧс гуранас. Ыджыд гы градйӧн-градйӧн саридз пасьтаыс шкув-шков паськалӧ-разалӧ…
Шузьӧма саридз ва нянь кӧтан шомӧс моз… Кыптӧ. Петӧ нин дорышӧн, чукйыс. Рокӧсыс, тыдалӧ, бур! (Шызьӧдӧ быдпӧлӧс йӧзӧс). Гыясыс саридзлӧн паськыдджык лоины вабергач джумкйысь. Вабергач сюйліс, ӧтарӧ суктыліс, гудыртліс. Саридз гыясыс — пожъялӧ, весалӧ нюйтсӧ. Гӧраӧн-гӧраӧн ветлӧ-разалӧ му шар пасьта, вылӧ качалӧ, быд пельӧсӧ инмалӧ гыясыс сылӧн.
Сійӧ сыныштӧмысь гыясыс дыр на оз лӧньны! Ёна швачкасны гӧраяс кыркӧтшӧ. Медджуджыд мувывса чурк вомӧныс, Гималай чурк вомӧн, койыштчас-резыштчас гыыс. Став му шарсӧ кытшовтас, кытчӧдз оз пожъяссьы став чукӧрмӧм няйтыс да лёкыс му вывсьыс. (Сэк вот и лоӧ «Всемирнӧй потопыд»).
