ЗАРНИ БӦЖА КАНЬ


1

Вӧрын, шувгӧны кӧн козъяс,
Коркӧ оліс-выліс гозъя.
Налӧн вӧлі ичӧт ныв:
Кывзіс бать-мамлысь быд кыв.
Ӧтчыд нылыд петіс йӧрӧ,
Кытӧн батьыс вӧлі гӧрӧ.
Видзӧдӧ да... мича, шань
Мунӧ гежӧм кузя кань:
Зарни бӧжа, эзысь кока,
Ломзьӧ кодзув кыкнан бокас.

Каньлӧн ворсӧ мелі син.
Радла ныв оз аддзы ин.
Матӧ сибӧдчӧ кань дінад,
Сійӧс кӧсйӧ кутны кинас.
Пышйӧ водзӧ мича кань —
Потшӧс дорӧ, сьӧд вӧрлань.

Кань кор потшӧс сайӧ воис,
Тупыльтчис да ош друг лоис —
Ыджыд-ыджыд мисьтӧм звер,
Вомсӧ восьтіс, пиньыс жер.
Нывлы шуӧ: «Сӧв ме вылӧ!
Он кӧ, сёя тэнӧ, нылӧй!»
Ёна повзис ичӧт ныв:
Воча шуны эз лысьт кыв.
Бӧрдігтырйи ичӧт нылыд
Пуксис ошлы мышку вылас.

Пемыд вӧрті мунӧ ош
(Сійӧ пармаад оз вош!).
Вуджис ю и уна сёртас,
Коркӧ сэсся воис гортас.
Ыджыд керка ошлӧн сэн,
Керка гӧгӧр джуджыд стен.
Нывлы ошкыд скӧра шуис:
«Ов тан! Гортад абу туйыс!
Пусьы-пӧжась, менӧ верд,
Видзӧд керка-карта берд!»

Кодыр нылыд пырис йӧрӧ,
Дзиръя чуш-чаш керис чӧрӧс —
Чирзӧ, песӧ ассьыс лёк:
«Тэнсьыд топӧда ме кок!»
Курччис кок чунь кильчӧ поскыс,
Кисӧ бытшкис гӧлик-роскыс,
Кильчӧ кӧсяк колскис юр,
Корӧсь коксӧ чуть эз пур.
Керка ӧдзӧс лёкысь дзуртӧ:
«Тэнсьыд орӧда ме юртӧ!»
Керкаӧ кор пырис нылыд,
Вомсӧ вежыньтіс сёй пач,
Броткис вомгорулас рач.
Пызан зым-зым кокнас керис,
Кольтан быд ног нылӧс нерис.

2

Щелльысь зарни юра чирк
Джодж шӧрӧ чеччыштіс звирк.
Шуӧ чиркыд: «Ичӧт нылӧй,
Кывзы, сьыланкыв ме сьыла:
	Чирик-чирк да
	Чирик-чирк.
	Ветлӧ ош тан
	Зым да йирк,
	Ӧні сійӧ вӧрын,
	Пемыд парма шӧрын.
	Локтас регыд бӧр,
	Воас тшыг и скӧр.
	Сылӧн паськыд вомыс
	Сёйӧ шаньга комын.
	Вомас шаньга лӧд,
	Кытчӧдз ош оз пӧт!
	Пельӧсас со потан,
	Сэтчӧ сійӧ водас.
	Ошкыд лоас бур,
	Гыжъялан кӧ юр...»
Сэсся чирк велӧдіс нылӧс,
Кыдзи пышйыны тась сылы.
Помасис кор сьыланкыв,
Ыджыд аттьӧ шуис ныв:
Тэ пӧ менам медбур ёртӧй,
Лок пӧ гӧститны ме ордӧ.
Ме вылӧ тан быдӧн лӧг.
Сэсся чирклы сетіс нӧк.

Нылыд ветьӧк корсьӧ кыськӧ,
Бура ставсӧ чышкӧ-мыськӧ.
Ӧдзӧс дзирйӧ кисьтіс сир:
Эз кут дзуртны ӧдзӧс дзир.
Мелӧн мавтіс саӧсь пач,
Вуштіс-чышкис чугун-рач.
Мыськис кос корӧсьлысь юр —
Корӧсь лои небыд, бур.
Рослысь тшӧтшкӧртыштіс тошсӧ,
Вӧчис киссьӧм кильчӧ поссӧ.
Эз кут чуткасьны сэк рос,
Эз кут курччасьны сэк пос.
Дзиръя век на пиньсӧ йирӧ.
Нывка мавтіс сійӧс сирӧн.

Шаньга пӧжаліс ныв — сёӧс
(Регыд ошкыд гортас воас!).
Медым ошкыд эз ло лёк,
Пуис ыджыд чугун рок.
Рытнас гортӧ локтіс ошкыд,
Мудзӧма зэв — кашкӧ-пошкӧ.
Видзӧдӧ да — ставыс мӧд:
Ставныс лӧньӧсь, быдӧн пӧт.
Тувччис ошкыд порог вомӧн,
Сёйис шаньга кызь-ӧ-комын;
Нюлыштіс чугунысь рок.
Водіс и нюжӧдіс кок.
Ичӧт ныв гыжъялӧ юрсӧ.
Ошкыд любӧысла мурзӧ.

3

Тадзи сэсся ичӧт морт
Ошлы кутіс овны горт.
Олӧ вежон, олӧ витӧс,
Ачыс гортланьӧ пыр витӧ.
Коркӧ сэсся ичӧт ныв
Ошлы шуӧ татшӧм кыв:
«Воштісны нин менӧ гортын,
Кӧть мед ветлін бать-мам ордӧ».
Ошкыд шуӧ: «Пӧжась вай,
Содтӧд пукты йӧра яй!»

Нывка пӧжасис зэв дыр.
Сӧвтіс ыджыд пестер тыр.
Сэсся ошлы шуис нылыд:
«Ачым сувта керка вылӧ,
Кута видзӧдны кузь вой:
Пирӧг-шаньга тэ эн сёй!»
Гыр сувтӧдіс керка вылӧ,
Сэсь мед ошкыс чайтас нылӧс.
Гырйыс эз, дерт, пасьтӧм вӧв,
Сылысь чышъян летіс тӧв.
Пестер пытшкӧ ачыс пырис,
Вылас шаньга тэчис тырыс.

Кыскӧ ошкыд — быттьӧ гира:
«Часлы шойчча, сёя пирӧг!»
Кылӧ гӧлӧс: «Ой, оз позь!
Тупкы бӧр пестерлысь розь!»
«Мый нӧ тайӧ? Век на аддзӧ,
Видзӧдӧ на нылыд татчӧ?»
Бара кыскӧ водзӧ ош,
Кокыс сылӧн век на чож.
Кыскис-кыскис, мудзис, кылӧ,
Пуксис сёйыштны мыр вылӧ,
Бара кылӧ нывлӧн гӧлӧс:
«Тэнӧ некыдзи он ӧлӧд!»
Эськӧ туйсьыс кӧть эз вош,
Сьӧкыда нин мунӧ ош.
Ошлысь нюкыртӧ нин кынӧм,
Лунтыр на эз сёйлы нинӧм.
«Видла ӧти шаньга кӧть!»
Бара кылӧ: «Дугды, шӧть!»

Коркӧ-й воис мужик ордӧ,
Кӧні нывлӧн вӧлі гортыс,
Шуис батьлы татшӧм кыв:
«Ыстіс гӧснеч тіян ныв!»
Ачыс пышйис скачӧн вӧрӧ
Потшӧс вомӧн и град йӧрӧд.
Батьыс шензьӧ кильчӧ вылас:
Пестер пытшкысь петӧ нылыс!
Радлӧ мам и радлӧ ай:
«Муса нывным ловъя тай!»

4

Ошкыд гортас воис рытын.
Корсьӧ, нылыд сылӧн кытӧн.
Керка вывсьыс аддзис гыр:
«Лэччы, шуӧ, гортӧ пыр».
Сэсся скӧрмис, босьтіс зор:
«Ачыд усян, зурга кор».
Гири-люки уси гыр,
Ошлысь лязӧдіс кыз ныр.
Ачым аддзылі ме тӧрыт:
Лясӧм ныра мунӧ вӧрӧд.