* * *

Ывлаыс асывсянь пӧжӧ,
Челядь со мунӧны ворсны.
Лэччыла Джеджимъю кӧджӧ
Кывбурӧ строкаяс корсьны.

Вӧсньыдик мыгӧра ныв моз
Вежнясьӧ-чуклясьӧ юыс.
Кывзӧны сялькӧдчӧм шысӧ
Берегын гожйӧдчысь пуяс.

Пӧрччыся. Потанӧ моз ме
Лайкъялысь гы вылас вода.
Кыдзи тай кагасӧ мамыс —
Гыыс сідз окыштлӧ вом дор.

Арпиян шуксьӧны ваас —
Комъяслӧн, сынъяслӧн челядь.
Юр весьтын чипсӧны кайяс —
Сьылӧмсьыс чуналӧ пельыд.

Шондіыс купайтчӧ юас,
Визлачас ӧзъялӧ биӧн.
Энлӧй жӧ, ю шӧрас уя —
Шондісӧ шылькнита киӧн.

Джеджимъю, нэмъяс эн пемдыв,
Пармаӧс пӧттӧдзыс юктав,
Муыслӧн сьӧлӧмыс медым
Тіпкӧмсьыс некор эз дугдыв.