ЫВЛАВЫВОшкӧм-сьылӧм — гимн

Ен югыд ывлаӧй!
Морт вӧчтӧг артмӧмторйӧй!
Пыдӧстӧм помтӧмӧй, дортӧмӧй,
Некытчӧ, нинӧмӧ тӧртӧмӧй,
Некутшӧм нимӧн шусьытӧмӧй!
Ог куж ме тэ йылысь висьтавныс,
Ог лысьт ме тэ йылысь шыавныс.
Помтӧмӧй, дортӧмӧй, ывлаӧй!
Мый нӧ ме кӧсъясӧ кернысӧ?!
Кыдз нӧ ме кужа ыдждӧдлыныс?
Кыдз нӧ ме лысьта артыштныыс?
Мыйторкӧд верма орччаавныс?
Кыдз нӧ ме лысьта тэнӧсӧ вӧрзьӧдны кывъяснас?
— Ок тэ, морт кывйӧй-сёрниӧй!
Ок тэ, коньӧрӧй мортӧй!
Кывйӧн ӧмӧй нӧ кӧсъян тэ
Висьтавны ен югыд ывлаыс йылысь?!
Шытӧлӧн ӧмӧй нӧ тэ кӧсъян
		Сьывнысӧ сы йылысь?
Сійӧ мичлун йылысь, сійӧ помтӧм олӧм йылысь,
Сійӧ ыджда-мера йылысь?
	Кутшӧм кывъясӧн шыасян тэ йылысь?
	Кутшӧм рӧма серӧн мичӧдан-
	пасъян тэ йылысь?
	Кутшӧм шытӧлӧн горӧдан сьывнысӧ
	Тэ йылысь, ен югыд ывлаӧй?
Ог, ог лысьт ме, ичӧтиктор тэнад,
Мувывса лов кутысь, шыасьны.
Сӧмын нӧ шемӧсӧн коля тэ водзын сулалан
Ме, тэнӧ аддзысь и кылысь, кывтӧм пемӧс моз.