ЫВЛА ЮГДӦМСӦ ВИДЗӦДАМ ВАЙӦ


Энӧ узьӧй водз асывсӧ, энӧй,
Ывла югдӧмсӧ видзӧдам вайӧ.
Чӧскыд уннытӧ ӧтчыд кӧть венӧй,
Шонді петӧмсӧ эн прӧзевайтӧй.

Регыд кыаыс енэжын садьмас,
Вӧр-ва весьтасӧ шевкнитас бордсӧ.
Лэбач чукӧрлӧн пансяс пӧсь свадьба,
Ылӧдз паськалас гажӧдчан гор сэк.

Кӧнкӧ шондіыс локтӧ на туйын,
Зарни петельсӧ мыччыны дасьтӧ.
Сюра тӧлысьыс кытчӧкӧ уйӧ,
Быттьӧ сур юан яндӧва-тасьті.

Энӧ узьӧй водз асывсӧ, энӧй:
Мича лун сійӧ аскӧдыс вайӧ.
Чӧскыд уннытӧ ӧтчыд кӧть венӧй
И ті воланныд мувывса райӧ.