ЮГЫД ВОЙ, КӦДЗЫД ВОЙ


Тӧлысь-кодзув ӧтарсянь —
					вылісянь.
Еджговлӧз лым мӧдарсянь —
					улісянь.

Юрвыв кодзув зэв вылын
					дзирдалӧ.
Шытӧг ылын, войвылын,
					чардалӧ.

Кӧдзыд ру кыпӧдӧ
				юкмӧссянь.
Лэчыд тӧв орӧдӧ
				войвывсянь.

Ягын кӧдзыд гораа
				швачкӧдчӧ,
Быттьӧ сэні кодікӧ
				поткӧдчӧ.

Гыӧртӧма мича коз,
				вугралӧ —
Гажа тулыс, шоныд гож
				вӧталӧ.

Еджыд кӧч лым вывті
					тупыльтчӧ.
Репасын сьӧла-тар
					йӧжгыльтчӧ...

Кодарсянькӧ кылыштӧ
					пон увтчӧм,
Мӧдарсянь нӧ — кок улын
					лым дзуртӧм...

Керкаясын быдӧн нин
					узьӧны.
Енэж вылысь кодзувъяс
					усьӧны,

Зарни, эзысь киньясӧн
					сявкйӧны,
Ньӧжйӧникӧн, шы ни тӧв,
					кусӧны.

Шудторйӧй, «кодзулӧй» мем
					мыччысис, —
Сы кузя нӧ тайӧ гижӧд
					лоыштіс.

Сійӧ кодзув енэжсьыс ме
					гусьышті,
Татчӧ сэсся, эзысьӧс, ме-й
					сюйышті.