Ю ВОМӦН ПОС

Войыс вӧлі сэзь да кӧдзыд. Кӧнкӧ ылын, небеса шӧрас, дӧввидзис гӧгрӧс кымӧса тӧлысь. Кӧдзыдыс аслас ён кабырнас топӧдіс-жмитіс паськыд ота юӧс. Йи пластъяс, кодъяс луннас на кывтісны ва ньылыд тэрмасьӧмӧн, ӧні воштісны вынсӧ, эз нин вермыны водзсасьны кӧдзыдыскӧд. Найӧ топӧдчисны ӧта-мӧд дінас, мурзӧны, ымзӧны, быттьӧ ён капканӧ шедіны да некыдз оз вермыны мынтӧдчыны.

Асъявылыс кӧдзыдыс ещӧ на чорзис. Ювывса йи пластъясысь артмис кузь да ыджыд эшкын, коді дыр кежлӧ шебраліс збодер юӧс, локтан тулысӧдз дзебис сылысь лӧсталысь отсӧ.

Колис ещӧ лун-мӧд. Кӧдзыдыс важ моз скӧраліс, эз личӧд вынъяссӧ. И со кӧдзыдӧн дорӧм пос дорӧ надзӧникӧн матыстчис шӧр арлыда, пеля шапкаа, дженьыдик пася морт. Сійӧ сувтіс кыркӧтш дорӧ, дыр видзӧдіс мӧдар берегас, кӧні сулаліс вӧр лэдзысьяслӧн ичӧтик посёлок, тыдалӧ, сэтчӧ кӧсйӧ веськавны. Сэсся мужичӧй киас босьтіс бедь, лэччис ю вылӧ и бедьнас видласигтырйи водзлань вӧчис кымынкӧ воськов. Муныштас, зутшнитас бедьнас водзлань, быттьӧ кӧсйӧ юавны юыслысь, лэдзас оз сійӧ ас вомӧн вуджны.

Йиыс ён нин вӧлӧма. Пода морттӧ лэптіс. Абу прӧста старайтчӧма кӧдзыдыс. Кутшӧмкӧ дженьыдик кадӧн ю вомӧн пос вермис вӧчны.

Сійӧ жӧ луннас ю вомӧн вуджис ещӧ на некымын морт. Тайӧ местаас, кыті мӧдісны вуджавны йӧз, некымын лун мысти уна кокъясӧн талялӧмысь артмис векньыдик пода туй, аслыссяма пос.

Мыйӧн пуксисны тӧвся лунъяс, туйсӧ вочасӧн паськӧдісны, вӧла-доддяяс сэті кутісны ветлӧдлыны. Водз асывнас на шойччысь юӧс садьмӧдасны турун кыскалысьяс.

«Чоп... чоп... чоп...» — вӧв кокъяс улын сьылӧ югыд йиыс.

Коркӧ сэсся воис и сэтшӧм кад, кор ювывса пос кузя мӧдісны журъявны автомашинаяс, тракторъяс. Йи улӧ дзебсьӧм ю кылӧ налысь гора шысӧ, любӧ быдсӧн аслыс. Видзӧдтӧ, кутшӧм буртор вӧчис кӧдзыдыс: керъястӧг ни кӧрта кӧлуйтӧг ёнысь-ён пос вермис вӧчны. Ӧні таті лун и вой кер кыскалӧны, быдсяма грузъяс новлӧны, совхозлы кӧрым да удобрение вайӧны.

Ю вомӧн нюжӧдчӧм пос тулысӧдзыс уджаліс, уна и буртор вӧчис йӧзлы. Тулыс матыстчӧмкӧд тшӧтш быри эбӧсыс тӧвлӧн. Вочасӧн тувсов шондіыс сывдіс йи вылысь став лымсӧ, сэсся ытваыс чегъяліс да кылӧдіс кӧдзыдӧн вӧчлӧм поссӧ. И пос местаӧ немтор эз коль, быттьӧ абу и вӧлӧма сійӧ, абу и уджалӧма лун и вой.

Но воас ар, сувтас йиыс, и пос йылысь бара мӧвпыштасны йӧзыс. Бара сійӧ лоӧ зэв коланторйӧн.

Татшӧм нин йи послӧн олӧм-вылӧмыс.