ЙӦГРАЛЫ

 (Гижӧд)

 1.
Со кыдз, зонмӧй, сійӧ мӧдӧм!
Коми школаясын ньӧр
Оз зэв швычьяв, эм кӧть вӧр…
Чӧвлы, велӧдчӧм и тӧдӧм
Паськаласны регыдик
Ачыс Тимаизӧдз дзик.
Эпидемия моз найӧ
Вуджасны и Урал сайӧ!

 2.
Кор ми этша школа-рок
Панялам, сэк вуджмысьт Урал
Сетам водзӧ сійӧс. Курал
Школа пыдӧс, йӧгра вок!
Мед и тэнад чорыд лы-сьӧм
Тӧдмалас тшӧтш школа висьӧм;
Мед и тэ, лёк теолог,
Артасян зэв миян ног:

 3.
Узьлывлӧ оз коркӧ Нума?
Весьт-ӧ-кык весьт сылӧн тош?
Ыджыд-ӧ му вылын ош?
Ош энь Нумаыслы кума,
Соч-ӧ-пӧч? Тшӧтш видчан мед,
Коді тамугӧ оз шед,
Код дженнетӧ оз ин? Татчӧ
Ог жӧ видчытӧг туй аддзӧ!

 4.
Мед и тэыс та бӧрын
Романтизмлысь тӧдан кӧрсӧ,
Мусаыдлысь нюлан чӧрсӧ,
Кодыр сылӧн сьӧлӧм кын,
И кор сійӧ — сідз нин колӧ —
Тэысь мусаджыккӧд олӧ…
Вой-вой пукав, дзугыль, виж,
Ныв йылысь поэма гиж!

 5.
Мед и тэнсьыд, кор та висьӧм
Лоас ёнджык, йӧгра вок,
Сьӧлӧмшӧртӧ ёнгас лёк…
Мыйла корысь паськӧм киссьӧм?
Мыйла оз пу кынӧмас,
Кодыр тшыгйӧн виньгыртлас?
Мед и тэ, кор тайӧс тӧдан,
Гуманизмӧн висьны мӧдан.

6.
Шогсьыд вунӧдчыв тэ сэк!
Мед кор рысялан, кор югыд
Он вӧч выльысь и он гугӧд
(Шаман, тӧд, мый бур, мый грек!),
Петан космополитӧ тэ,
Кыдз Германияын Гётэ,
Мича сьылан нюжӧдан,
Кӧть и пыр на виньгыртан!

7.
Мед и тэ, кор Гёте ногӧн
— Сійӧ вӧліс ачыс пӧт —
Он зэв нюжӧд мича вӧт,
Мед и тэсӧ выльвыв шогӧн
Вийсьыштан — и Байрон ног
Чайтлан дыр кежлӧ кӧ мог
Ас саяд быд енмӧс ёрны,
Найӧс лёк кось вылӧ корны.

8.
Мед и тэ, кор, йӧграӧй,
Байронизмысь бурдны пондан,
Дыр на морӧс пытшкад шондан
Лӧгтӧ шуысь вылӧ: «Йӧй!
Медвыль енкӧд эн тэ вермась
И поэт вылӧ эн тэрмась
Пуктысьны. Эм тэнад удж!
Паськӧд сывтӧ, состӧ пудж!»

9.
Мед и тэ (пыр лоас тэкӧд
Тадз жӧ, кыз уджысь он тшӧг!)
Лёк вӧсна син тупкывтӧг
Серӧктылан Беранжекӧд,
И Барбье моз лӧгасьлан,
Да и морт моз бурасьлан
Олӧмыдкӧд… Быд ног овлӧ;
Серавны и бӧрдны ковлӧ!

10.
Мед и тэ, зон, шмыньявлан
Ас вӧчӧм ен вылад бура
(Мортлӧн мелі тай натура!)
Кыдзи ӧнъя истукан
Гейне… Сӧмын кыдзи рочын
Быд поэт, эн бӧрд; сэн шочын
Пессимизм оз лимзы… Зон!
Эн босьт ӧти олӧм тон!

11.
Мед и тэнад кымӧс вылӧ
Важ Европа ляпӧдлас
Быдся ас сісь измлысь пас;
Мед и тэнад этша кылӧ,
Кыдз выль йӧзлӧн, вем чорзьӧм,
Кызь арӧсӧн кос висьӧм,
Тамышмӧм; мед, йӧгра-й, тэнӧ
Медицинаын ог венӧ!

12.
Мед и тэ нин вӧрзьыштан,
Мед и тэнад олӧм ӧзъяс,
Петан туйӧ, кодӧн йӧзъяс
Мунӧны, — и кӧйялан
Накӧд корсиг ассьыд шудтӧ,
Мед и тэ он регыд кут тэ
Сійӧс бӧжӧдыс; а сэн
Мед и тэкӧд лоас ен!