ЫЛЫСМЫСЬ ТОМЛУН


Зарни томлунӧй ӧвтчӧ со мен:
Аддза син водзысь дзоридза чышъян.
Муса томлунӧй, эн котӧрт, эн, —
Мыйла та ӧдйӧ ме дорысь пышъян?

Кӧть тэ здук кежлӧ сувтыштлы вай, —
Тэтӧг ковмас на коллявны нэмӧс.
Менӧ пӧрысьӧн эн на тэ чайт,
Кӧть ме дзор, а тэ вӧт нисьӧ вемӧс.

Тэкӧд югыдджык ывла выв мич.
Тэ мен вӧвлін пыр гудӧкъяс шыа...
Менам томлунӧй дзирдыштліс сідз,
Кыдзи лысваын пӧртмасьысь кыа.