ЫЛЫС ГӦЛӦС

Гриш Саш паметьлы

Ӧшинь увтіыд кор муна,
Дзорга, он-ӧ мыччысь тэ.
Вояс колисны кӧть уна,
Тэнӧ сэсь ог аддзы ме.

Сӧмын кыла ылыс гӧлӧс,
Коді гажа вӧліс пыр,
Думъяс паніс уна пӧлӧс,
Пукавлім кор варгигтыр.

И мен сувтӧ синъяс водзӧ
Кывтысь еджыд пароход,
Коді гожся асывводзын
Фронтлань вундӧ Эжва от.

Кыла пушкаяслысь укйӧм
И кыдз трачкӧ автомат.
Тэнӧ свинеч шер эз сувтӧд,
Танк, ни потласьысь снаряд.

Повтӧг мунін вӧрӧг вылӧ,
Ачыд кӧдзин свинеч шер,
Мед эз лок фашистскӧй йылӧм,
Куліс мед фашистскӧй зверь.

И ми тэнӧ виччим гортӧ,
Гажӧдін мед Коми му.
А вот кӧн тэ, дона ёртӧй?
Морт мен стӧча кыв оз шу.

Сӧмын кывлі — вирӧн ойдӧм,
Вӧлӧм, джоджын куйлан тэ
Да сэк, вунӧдӧмӧн дойтӧ,
Казьтылан ас вӧр-ватӧ.

Шуӧмыд: «Фашистскӧй пленӧ
Менӧ вайӧдіс ён дой.
Кула, но оз чегны менӧ,
Кӧть и куйла, кыдзи шой!

Тышкаси ме, кыдзи верми,
Кыдз салдат и коммунист.
Гортын висьталӧй: эг нэр вӧв, — 
Бойын тіраліс фашист».

Дона друг, ми тэныд эскам,
Тӧдам, враг водзын эн пов,
Тышын мичтін ассьыд места, — 
Весьшӧрӧ эн сет тэ лов.

И кор тіян дорті муна,
Дзорга, он-ӧ мыччысь тэ.
Вояс колисны кӧть уна,
Тэнӧ сэсь ог аддзы ме.

Сӧмын кыла ылыс гӧлӧс,
Коді гажа вӧліс пыр,
Думъяс панліс уна пӧлӧс,
Пукавлім кор варгигтыр.