ВЫЛЬ ЕКТЕНИЯАрся рытын сёрӧн Вичко потшӧс дорын Манакиня корис Ассьыс мусуксӧ. Эз лок сэтчӧ морыд... Ен водзын сэк гора Сьӧлӧмшӧрсӧ ёрис. Мӧдкӧд мунӧма. — Господьӧй да енмӧй, Сьӧлӧмсянь тэд кевма, Кӧнкӧ кӧ тэ эм на, Гажмӧд сьӧлӧмӧс. Кыліс енмыд... Войысь Другысь югыд лоис — Четверть вина воис Ӧшинь розьӧдыс. Войбыд равзӧм кыліс — Манакиня сьыліс Зэв еннога сьылӧм Уна ногъясӧн. Асъя тоньгис гора... Вичко ӧдзӧс дорын Кодкӧ лӧвтӧ нора — Сэтчӧ усьӧма. Локтӧ поп-дяк сьывны, Аддзис воссӧ нывлысь, Лӧвтӧм кутіс кывны: — Аттӧ, трасича. Локтіс куим пӧчӧ. Воссис вичко ӧдзӧс — Попыд висьтъяс кӧдзӧ: — Лои чудеса. — Тані тайӧ нылыс Войбыд кевмис, сьыліс... Миян олӧм йылысь Усьтӧдз кевмӧма. Сэтшӧм ёна кевмас — Петкӧдчылас енмыс, Медся ыджыд енмыс Ыджыд милӧсьтнас. Енсьыс повзяс — сӧрӧ, Вомыс муртса вӧрӧ, Рушку пытшсӧ кӧрӧ — Кодкӧ пырӧма. — Чеччы, муса чойӧй, — Босьтіс поп-дяк сойӧд. — Кузь ӧд арся войыд, Мудзин ёна зэв! Гусьӧник дяк шуӧ: — Мый ӧтнадӧн юан? Менӧ — мый эз нуӧд — Важӧн телепит. Пӧрысь пӧчӧ кевмӧ: — Господьӧй да енмӧй, Талы моз жӧ меным Асьтӧ петкӧдлы!
