ВОӦ ПЫРИГӦН

1

Кольӧ во, и кольӧ сійӧ бӧрӧ;
Но а менам бурдтӧм сьӧлӧм дой
Век на вуджӧ выль во вылӧ, тӧрӧ...
Радлуныс да шудыс оз на кой.
Син оз ёр на олӧмыслӧн баныс,
Югдывлас и сӧмын ӧти сутш.
Сьӧлӧм бурмӧдлывлӧ сӧмын тані
Дона йӧз и сьылан-гижан удж.
Олӧм дорас ме ӧд эг на кӧдзав,
Кӧть и усьлӧ сьӧлӧмӧй и лов.
Менам ёртъяс, веськыдӧсь да сӧдзӧсь,
Тікӧд орччӧн эськӧ ов да ов!
Но а кодлӧнкӧ нин синмыс сырмӧ,
Видзӧдласыс букыш да зэв лӧг.
Мен и сытӧг шогыс-дойыс тырмӧ,
Бара кылала ме ю шӧрӧд, кыдз лӧп.
Он и тӧдлы, вабергачас нуас,
Кыскас йирас, кытысь он нин пет.
Ёртӧй синмӧ веськыд кывсӧ шуас,
Меным Енмыс вошнысӧ оз сет.

2

Югдӧ. Лымъялӧ.
Шы ни тӧв.
Весиг кар вылын
Век на чӧв.
Кытчӧ велалан,
Сэн и горт.
Чужи сиктын,
А карса морт.
Тані ёртъясӧй,
Тані удж.
Мӧдлапӧлас ме
Ог нин вудж.

3

Кор ме воа чужан керка дорӧ,
Ӧшинь улын оз нин сулав зорӧд.
Потшӧсъясным муртса нин оз пӧрны,
Эндӧма и векняммӧма йӧрным.
Мӧска вӧлі мамӧ, мыйта ыжыс...
Ӧні быттьӧ сійӧ ачыс мыжа.
Дивитана видзӧдӧ ме вылӧ,
Мамӧ, тэнсьыд дойтӧ ме ӧд кыла!

4

Дона меным вӧльнӧй светыс,
Мамӧй, коді олӧм сетіс.
Майбырӧй дай олӧмӧй!
Му выв гажыс меным муса.
Воас кад, и коркӧ куса.
Уна вӧчны колӧ на:
Сьывны шань бур коми кывйӧн,
Чужан муын, парма сывйын,
Ме ӧд ловъя, ола на.
Кодкӧ, гашкӧ, менӧ кылас?
Мед жӧ эськӧ бур му вылас
Эз ло прӧста волӧма.