ВОКЛЫ

«Ме коркӧ ставсӧ тэныд висьтала...» 
Е. Козлов

Ме, дерт жӧ, ставсӧ коркӧ висьтала,
Кор паныдасям воча лов,
А ӧні кисьтала и кисьтала,
И быттьӧ некод нин оз ков.
Ни стӧкан лэптысьыс, ни вомъёртыс,
Ни сьылан друг, ни сӧран ёрт.
Ме тӧда, орччӧн пыр на довъялӧ,
Оз инас ӧшйы тэнад орт.
И дерт нин, тэныд ёна забеднӧ,
Мый тшӧтш он вермы босьтны гор,
Да мекӧд лёк гӧлӧсӧн авзыны,
Ме гажа юрӧн сьыла кор.
Ми вокъяс шмоньӧн вӧлім унаӧн:
И «пӧльӧ-вок», и «батьӧ-вок»...
Да со тай вӧляникысь мунінныд.
Сэн бара тіян абу лёк:
Ӧд воин «рӧдительяс» чукӧрӧ,
Да сэні рушкуныд оз пот,
Кӧть помся кӧтанныд да сӧранныд
И вӧвлӧмтор, и анекдот.
А тані зарни ар нин помасис.
И мусӧ едждӧдліс нин лым.
Ме ӧтнам унаысь нин сконъясьлі,
Ӧд бордпӧв быри. Швачкис гым
Дзик керка шӧрӧ кыдзкӧ виччысьтӧг
И менсьым чегис лэбан борд.
Да... кыдзкӧ друг тай, вокӧ, личӧдчин,
Да чинтін меӧн кутан орд.
Со ӧні ӧтнам сэсся кисьтала,
Кӧть эськӧ ловъя вокъяс эм.
Став ӧніясӧ коркӧ висьтала,
Но кор нин вуджа ассьым нэм.