ВЕСЬЯС ДА ЧУДЬЯС

Учительнича миян вӧлі да, вот кӧнджык, сійӧ эз висьтав, а кӧн пӧ комияс олісны, сэні пӧ чудьяс овлӧмаӧсь. Джиянын на эмӧсь чудь гуяс.

Ыджыд айӧ шуліс жӧ, тані пӧ весьяс да чудьяс олӧмаӧсь. Весьясыс абу тыр йӧз, полысьӧсь, бӧбӧсь, нинӧм оз сяммыны. Сэтысь со и кывъясыс — весь кодь, весьӧ пӧрны, весьӧ вошны.

А чудьяс вӧлӧмаӧсь уджач йӧз, найӧ язычникъяс. Степан Пермскӧй кӧсйӧма найӧс пыртны ен вераӧ, кӧсйӧма кайны Висерӧдз. Ю кузя вӧлӧм кайӧ, сэк ӧд туйяс эз на вӧвны, юысь кындзи сэсся некутшӧм туй. Чудьяс и потшасны Висер юсӧ изъясӧн. Джиянысь неуна улынджык изйӧн потшӧминыс. Ме ачым аслам синмӧн аддзылі, кор кос ва, сэк изъясыс чурвидзӧны Галябӧж горулын. Кывтыд шорсянь берег пӧлӧныс галя изйӧсь, сійӧ шусьӧ Галявыв. Ӧзыныс Джиянас вылынджык, сэні абу галя изйыс. Кор Галявылыс помасяс, сэсся сэні и потшӧмаиныс. Кос ва дырйи ваыс толькӧ сяркъялӧ. Кывтчӧс ногӧн кӧ, веськыдладор берегсӧ мыйкӧ мында абу потшӧмаӧсь, медым толькӧ дзоля пыжӧн пыран. Изсӧ сэні ваыс вермис нин путкыльтны...

Вит километраӧн Джиянсьыс улынджык эм ичӧтик шор. Ме ачым ог тӧд, эг аддзыв. Шуӧны, Висер вылӧ усьӧ, шусьӧ (местаыс) Видчанвом шор. Шуласны на: «Кытчӧ пӧ нӧ мунан-а? Видчанвом шорын пӧ видз да сэтчӧ». Правильнӧ кӧ эськӧ, Виччысянвом шор да. Сэті нӧрыса кодь, бужӧда, крут берег, абу ласта. Вот сэтӧні вӧлӧма гу. Чудьясыс веретя вылас кодъясны, гу кодъясны, ыджыд, мед аслыныс дзебсьыны. А сэтысянь и кывтчӧс, и катчӧс ылӧдз тыдалӧ. Кор найӧ аддзасны локтысьяссӧ, долженӧсь ӧзтыны ыджыд кӧстьӧр. Сійӧ лоӧ знак, колӧ, значит, точно гуасьны. Кор кутасны локны Степан Пермскӧйлӧн йӧзыс, гуас пырасны и клопкысясны. Сэтӧні как раз Вотавидз миян вӧлі, зэв бур туруна видз. Миян видзсьыс чуть-чуть катыдланьын чудьясыс кыйӧдчӧмаӧсь.

Джиян гӧра йылын. Джиянӧдзыс катан, катан ю кузяыс. А мукӧд гуясас он веськав юсяньыс, а колӧ сӧмын туй кузяыс. Эм сэтшӧм места Ягвыв, а яг бокас вӧлі нюр. Ӧні сійӧс косьтӧмаӧсь. Джияна-Ягвыла костіыс визувтӧ шор, Прудшор, дзоляник шор вӧлі важӧн. Ёна сійӧс луалісны да ӧні ёна паськыда визувтӧ... Тележнӧй туй мунӧ, Чуб ты дортіыс мунӧ. Чудь гу пӧ сэні эм, ыджыд айӧ шуӧ вӧлі, шӧрланьыс, зэв мича эжаа места эм да. Сэтӧн ме коркӧ, ыджыдджык нин вӧлі, шуйга ки вывсьыс казявлі гу кодьяс. Квадратнӧй, роптолӧн шӧрыс усьӧма. Сэтӧні, пыралі гуас да, меным сюри ыргӧн бляха. Ки пыдӧсысь ичӧтджык. Гортӧ вайи. А сэсся Сидоров миян пыр мунлі да сылы висьталі. А град вылысь сюри эта пасьта деньга, абу гӧгрӧс, а быттьӧ кералӧма. Ме Сидоровлы петкӧдлі да сэсся пӧдариті. Сеті. Куим гу вӧлі шуйгаладорас. Ӧні сійӧ гуясыс нин шылясисны.

Сидоров воліс миянӧ 1921ʼ воӧ.