* * *

Весиг сыркмунлӧ телеэкран,
Кодыр пурӧны Мусӧ снарядъяс.
Сотчӧ Олӧм то сэні, то тан,
Кӧні ки помысь вӧчӧны адсӧ.

Пеж войнаясысь мудзис нин кӧрт,
Мудзис сынӧдыс, вӧр-ваыс ойзӧ.
Кызьӧд нэмыс эз этша нин бӧрд
Мулӧн морӧсын бырлытӧм дойысь.

Шызьӧ Му... Уна вурыса Му
Миллионъяслӧн гӧлӧсӧн корӧ:
Медым Олӧмыс тшынйыв эз мун,
Медым пыр кежлӧ Морт колис Мортӧн.

Кута эскыны йӧзыскӧд ме:
Кага нюмсерӧн Аскиыс чужас.
Вайӧ воюйтны сы вӧсна, мед
Му шар пасьтаыс ломзис пӧсь дружба.