ВАЖ ОЛӦМ ВЕЖСЬӦ

Быдлаын дзик быдтор вежсьӧ,
Выльтор локтӧ, важыс вешйӧ, — 
		Бӧрӧ кольӧ, вунӧ.
Кад оз сувтлы — водзӧ мунӧ,
Олӧм вежсьӧ лунысь лунӧ,
		Водзӧ пырӧ, сунӧ.
Воысь воӧ йӧзыд сюсьмӧ,
Вежӧръясныс налӧн ёсьмӧ,
		Син водзныс век ыждӧ.
Важ морт вӧлі лёка олӧ,
Сылы гежӧда гаж волӧ,
		Йӧзыд енмӧс мыждӧ:
— «Енъяссянь пӧ татшӧм олӧм.
Миян вунӧ наысь полӧм, — 
		Кысь нин бура овны;
Колӧ кевмыны зэв ёна,
Налы козин вайны уна,
		Бура олӧм корны.
Оланногыс — муын, ваын — 
Дзик ӧд ставыс енъяс сайын,
		Выныд налӧн помтӧм».
Выль йӧз сідзи оз нин шуны,
Козин енъяслы оз нуны,
		Кевмӧм ӧні тӧдтӧм.
Весиг некодысь оз повны;
Кужӧны кыдз колӧ овны.
		Сюсьӧсь выль том войтыр!
— «Асьным кӧ пӧ огӧ мырсьӧй,
Некор ог аддзывлӧй бурсӧ,
		Ас сайын пӧ быдтор.
Став лёкторсӧ, важсӧ быртам,
Олӧм пытшсьыс нетшкам, бертам,
		Олӧм ногсӧ вежам.
Небесаӧ огӧ кайӧ,
Сэтысь райсӧ муӧ ваям, — 
		Йӧй туй вывсьыс кежам.
Ӧні школаясӧ ветлам,
Юр садь ассьыным ми содтам,
		Кутам быдтор тӧдны.
Кор ми надейтчӧмысь дугдам,
Сэки вӧлись, вокъяс, кутам
		Кокньыд уджӧн пӧтны».