ТУЯСЬӦМ

Талун ывлаыс кымӧра да гебйӧсь. Прамӧй тӧвру абу. И колӧ жӧ вӧлі пӧчыслы татшӧм поводдяӧ морков градсӧ ёгысь весавны. Лёшӧ отсасис пӧчыслы. Кӧть эськӧ регыд на кадыс коли, но коскыс мудзис нин. Сувтыштлас, видзӧдлас енэжӧ, оз-ӧ зэрмы, да коссӧ зырыштас:

— Мудзис коскӧй.

— Мудзин кӧ, шойччышт, — шуис пӧчыс.

Лёшӧ кӧсйӧ нин вӧлі котӧртны улич вылӧ, но аддзис на дорӧ локтысь Марпа пӧчӧс да сувтіс.

— Чолӧм, Петровна, — шыасис Марпа пӧч.

— Чолӧм, Васильевна, — вочавидзис Лёшӧлӧн пӧчыс.

Кык пӧчлӧн медводз сёрниыс заводитчис град выв пуктасъяссянь. Кодлӧн кутшӧм петасыс да бура-ӧ быдмӧны. Сэсся, тыдалӧ, Марпа пӧчлы тӧд вылас уси майшасянторйыс, да юаліс:

— Тіян градтӧ каньясыд оз парсавны?

— Оз торъя, — вочавидзис Лёшӧлӧн пӧчыс. — Миян град дорсӧ пӧвъялӧма да оз кайны, ог казявлы.

— Ме пӧгубитчи. Став каньыс матігӧгӧрсьыс волӧны миян град вылӧ. Мыйсӧ сӧмын эг вӧч. Ставыс весьшӧрӧ, — шогпырысь висьталіс Марпа пӧч.

— Весиг миян Васьканым тшӧкыда сэтчӧ петалӧ, — сюйсис сёрниас Лёшӧ.

— Мый сэсся вӧчны? — ышловзис Марпа пӧч.

— Колӧ кыйӧдны да тшапнитны ӧтиӧс. Повзясны да оз кутны локны, — видліс такӧдны Марпа пӧчӧс Лёшӧ.

— Ог тӧд, ог тӧд, отсалас оз тшапнитӧмыд.

— А ми Ванякӧд кыйӧдам волысьяссӧ, — збоя шуис Лёшӧ да юаліс: — Ваняыд гортад?

— Гортын, мультфильм видзӧдӧ.

— Ме чукӧста сійӧс, — мунігмозыс нин шуис Лёшӧ. — Ми сыкӧд туялам волысьяссӧ да повзьӧдам.

Лёшӧ котӧрӧн петіс асланыс ӧшинь улысь да восьтіс дзиръя ӧдзӧссӧ Марпа пӧчлысь. Зонка радлыштіс весиг, мый на дорӧ локтіс Марпа пӧчыс. А то дзикӧдз нин дышӧдіс ёгсӧ весавны морков градсьыс. Ӧні кӧть ас сьӧлӧм серти уджӧ босьтчасны. Пырис Ваня дорӧ да порог дорсяньыс горӧдіс:

— Ваня, тэ мультфильм видзӧдан, а сэккості тіянлысь градтӧ каньяс парсалӧны!

— Кӧні? — пыр жӧ уськӧдчис Ваня ӧшиньӧ.

Но ӧшиньсяньыс нинӧм эз тыдав, да петіс кильчӧ вылӧ. Но и сэсянь каньясыд эз тыдавны.

— Шмонитан? — бергӧдчис Ваня Лёшӧлань.

— Ог, — шуис Лёшӧ да дженьыдика висьталіс Марпа пӧчлысь каньясӧн пӧгубитчӧмсӧ.

Кык друг кутісны мӧвпавны, мый вӧчны. Петісны град йӧрӧ да кытшовтісны морков градсӧ. Налӧн синъяслы нинӧм грекуйтанаыс эз усь. Ни ӧти кань эз вӧв. Сӧмын кытсюрӧ морковыс водӧма. Марпа пӧч лӧсьӧдӧма нин парсалӧм местаяссӧ. Лёшӧ да Ваня пуксисны жытник дорӧ, сайӧдінӧ, да мӧдісны кыйӧдны каньясӧс. Локтасны кӧ, колӧ найӧс сідз повзьӧдны, медым нэм кежлӧ вунӧдасны волыны. Та ради зонкаяс сёрнитчисны не жалитны весиг ассьыныс Васька да Барсик каньяссӧ.

Пукалӧны зонкаяс жытник дорын да кыйӧдчӧны. Коркӧ-некоркӧ сэсся бӧжсӧ лэптӧмӧн кыськӧ локтіс гӧрд кань. Воис морков град дорӧ, исышталіс да заводитіс град боксьыс мыйкӧ лукйыны. Ваня кӧсйис нин уськӧдчыны сы вылӧ. Но Лёшӧ кутыштіс: виччысьлам пӧ, видзӧдлам, мый водзӧ вӧчны кутас. Каньыд водзӧ кутіс кыкнан лапанас гудйысьны да мыйкӧ сэсь перйис. Та бӧрын зонкаяс эз сэсся виччысьны. Найӧ горзігтырйи уськӧдчисны кань вылӧ:

— Брысь, рыжӧй!

Гӧрд кань повзис да зэв ӧдйӧ пышйис. А зонкаяс мӧдісны видзӧдавны каньлӧн парсалӧминсӧ. Лёшӧ лукйыштіс да перйис дӧратор. Босьтіс киас, а нырас пыр жӧ вартіс дукыс:

— Валерьянкаӧн ӧвтӧ, — мыччис дӧрасӧ Ванялы. — Дукышт вай. Ӧні гӧгӧрвоана, мыйла каньясыд татчӧ волӧны. Ваня, помнитан, урок вылын Анна Ивановна висьтавліс, мый каньяс пӧ зэв ёна радейтӧны валерьянка дуксӧ.

Ваня босьтіс дӧраторсӧ да тшӧтш дукыштіс.

— Да, збыльысь валерьянка дука. Коді нӧ дӧрасӧ татчӧ пуктіс? Марпа пӧч ачыс али мый? — заводитіс майшасьны Ваня.

— А ми сылысь и тӧдмалам, — шуис Лёшӧ.

Зонкаяс матыстчисны Марпа пӧч дорӧ, киас аддзӧм дӧрасӧ кутӧмӧн. Со пӧ ми аддзим, мый гудйӧны вӧлі каньясыд.

— Коді нӧ вермис дӧрасӧ градъяс дзебны? — юаліс Лёшӧ.

— Некод эз дзеб. Ме ачым пукті. Меным сусед, Кузьма пӧль, тшӧктіс. Валерьянкаа дӧра пӧ пукты градъяд. Ӧти кань пӧ оз сэсся волы.

— Йӧюк, — эз вермы кутчысьны Ваня да серӧктіс. — Кузьма пӧльыд ылӧдліс тэнӧ. Каньясыд валерьянкатӧ радейтӧны, сійӧн и локтӧны.

— Но, Кузьма пӧль, водзӧ тадзи он кут шмонитны! — веськыда шуис Лёшӧ да босьтіс дӧрасӧ Ваня киысь.

Ваня колис пӧчыс дорӧ. Пӧчыс кутіс мыйкӧ юасьны сылысь. А Лёшӧ видзӧдліс Кузьма пӧль йӧрӧ да кавшасис потшӧс вылӧ. Звирк чеччыштіс да дӧрасӧ Кузьма пӧльлы аслыс морков град бокас дзебыштіс. Сэсся регыдӧн бӧр петіс йӧрсьыс.

— Ӧні ачыд каньяссӧ вӧтлӧдлышт, — ас кежсьыс ропкыштіс Лёшӧ.

Та бӧрын лун-мӧд мысти Лёшӧ да пӧчыс паныдасисны Кузьма пӧлькӧд лавка дорын. Няньла вӧлі локтӧма. Кузьма пӧль кутіс норасьны пӧчлы:

— Ог тӧд, мый вӧчны, дзикӧдз ӧдӧлитісны каньясыд. Морков градйӧс парсалӧны.

— Ме ог жӧ тӧд, — шуӧ пӧчыс.

— А ме тӧда, — вильыша горӧдіс Лёшӧ. — Колӧ валерьянкаӧн градсӧ пызйыны.

Кузьма пӧль кӧсйис на мыйкӧ шуны, но сідз и коли восьса вомӧн сулавны. Гӧгӧрвоис, буракӧ, мый Марпа пӧч вылын тешитчӧмыс аслыс бергӧдчис.