ТУВСОВ ГОР


Кытчӧ воши тувсов горыс?
Кутшӧм тулысыслӧн сям?
Рытнас жургӧ вӧлі шорыс,
Талун кынмӧма со кам.
Жугла йисӧ беддьӧн, кокӧн.
Аслам пыжлы восьта туй.
Бабӧ стрӧга шуӧ: «Ноко,
Коктӧ ва пытшкӧ эн сюй!»
Ӧлӧдӧмтӧ кывзан дыр-ӧ,
Кодыр кокыд ачыс пырӧ?
Тюльс да тёльс и ваын ачыд,
Кӧтасьӧма кок и гачыд.
Оз ков тшӧктӧм, паччӧр вылӧ
Кашки-кайи пырысь-пыр.
Бабӧ ёна увгис, кылӧ,
А ме ланьтӧма, кыдз шыр.
Но со бара ывла корӧ.
Пета писькӧдны ме шор.
Медым миян керка дорын
Гажа сяльгис тувсов гор...