ТУЛЫС ВОӦМ

Улльӧв кодь небыд тӧв лунвывсянь пӧльтӧ — вайӧдӧ чӧскыд кӧр, лӧсьыда чужӧмад ӧвтӧ... Енэжын шондіыс вылі нин ветлӧ — дзирдалӧ югыда, синъястӧ ёрӧ. Сывны нин вӧрзьӧма лым — мутшкысьӧ-топалӧ, кок улын сыв. Гож водзын лӧзӧдӧ, сӧнікӧ пӧрӧ. Толаяс ляпкалӧ, чинӧ. Гӧгӧр дзик личалӧ, прӧстмӧ!

Ӧдзӧсыс тулыслӧн паськыда воссьӧ...

Ывлаыс гораммӧ, быттьӧкӧ выль мыськӧм, пелькӧдӧм керка, гудырыс-няйтыс идрасьӧм сэсь. — Гажа сэн, гора и кыпыд, кокньыда ветлӧдлӧ лолыд. Ывлавывторъяс ылыстчӧ кытчӧкӧ ылӧ... Енэжыс кыптӧ зэв вылӧ. Кымӧръяс качӧны.

Воссьӧма вӧр-пу йыв — мезмӧма лымйысь. Гылалӧ-шупкысьӧ ув вылысь тукта... Лым ваӧн мыссьӧмаӧсь лысъяс: быттьӧкӧ долыда асывводз чеччӧм, сӧстӧм зэв чужӧмаӧсь сулалӧны пуяс.

Тёпкӧ-виялӧ вевт вылысь войтва... Со, тонӧ, гож водзӧ петӧма курӧг, лажъялӧ-ветлӧдлӧ ньӧжйӧник тшапа. Петуклӧн чуксасьӧм прӧста зэв кылӧ, юръялӧ йӧлаыс, сикт кузя ветлӧ... Долыдджык кажитчӧ ракалӧн кравзӧм.

Ыліӧдз ывлаын сёрнияс кылӧны... Зіль йӧзлӧн керасьӧм (тшупсьӧм да поткӧдчӧм), чер шыяс камгӧм — тэрмӧдлӧ, удж вылӧ ыстӧ. Шко-о-ов, — кылӧ гораа вадорысь нӧшасьӧм шы... Керкаясын дугдывтӧг швачкӧны-кыӧны дӧра. Шаргысьӧ дзавъян шы, быдмасян гымгӧ...

Со, тонӧ, детина керкаысь ывлаӧ петіс (мынӧма кагаысь, керкаын тулысын гажтӧм). Видзӧдліс ӧтарӧ, мӧдарӧ... сьӧлӧмсьыс нимкодя, мый вомас тӧрис, горӧдіс: «Э-э-эй!», сэсся тай садьтӧгыс котӧртіс кытчӧкӧ водзӧ...

Бузгӧны сёнъясӧд ӧдӧбӧн, письтӧмась шоръяс... Гӧгӧр дзик ловзьӧма, нюмъялӧ-сьылӧ.