ТӦВ НЫР


	Вӧр пу шувгӧ,
	Кылӧ увгӧм, —
Ыджыд тӧв ныр мунӧ шкувгӧмӧн:
Джуджыд парма сайын лёк,
Дзескыдінын сылы шог.
Локтӧ пуяс вомӧн шкувгӧмӧн...
Вӧрӧ ставнас парма му,
Вужнас пӧрласьӧ кыз пу.
	Вӧр пу шкувгӧ,
	Кылӧ увгӧм, —
Ыджыд тӧв ныр мунӧ шкувгӧмӧн.
	Кодыр йӧрмӧ,
	Ёна скӧрмӧ —
Лявзӧ, лӧвтӧ, пон моз увтӧ сэк.
Тупкӧ сьӧд пармаысь туй —
Пӧрӧ шуй вылӧ сэн шуй.
Мунӧ тӧв ныр гора бувгӧмӧн:
Колӧ сылы паськыдін,
Мед оз аддзы помсӧ син...
	Вӧр пу шувгӧ,
	Кылӧ увгӧм, —
Ыджыд тӧв ныр мунӧ шкувгӧмӧн.
	Нӧрыс вылын,
	Парма йылын
Джуджыд вӧрыс тшема сувтӧмӧн
Тӧвлысь мунӧм кутӧ сэн, —
Ыджыд кыпӧдӧма вен...
Тӧлыс швучкӧ... Пуяс увгӧны...
Чуймис муыс... Шемӧс — тыр, —
Петіс тӧв ныр парма пыр!
	Вӧр пу шувгӧ,
	Кылӧ увгӧм, —
Ыджыд тӧв ныр мунӧ шкувгӧмӧн...
	Коми йӧзӧй!
	Сійӧ вӧзйӧ
Тэныд бурджык олӧм увгӧмнас!
Коми муыс шы ни тӧв,
Сӧмын тӧв ныр оз ов чӧв:
Кучкӧ, швачкӧ, скӧра юргӧ сэн.
Тӧв ныр мозыс сувт вай, ёрт!
Чеччы, мездмӧм коми морт!
	Аддзан: увгысь
	Тӧв ныр шувгӧ —
Письтіс вӧля вылӧ шкувгӧмӧн!