ТОНЯ

А. В. Катаевалы — «Вымскӧй» совхозлӧн
Турьяса отделениеысь медбур дояркалы.

Кисьтӧ зэр, либӧ шутьлялӧ бушков — 
Син ни пель! Но том аньлы дзик весь.
Индӧм кадыслысь визь ньӧти вуджтӧг
Мунӧ удж вылӧ: удж — сылы честь.

Мунӧ медводзын — стройнӧй да мича,
Кыдзи сьыланкыв, — быдлаын ритм.
Сылысь мыгӧрсӧ нэмтӧ кӧть видзӧд,
Нюмыс коялӧ шонділысь дзирд.

Сылы ӧвтчӧны топольяс, кыдзьяс,
Лым кодь дзоридзсӧ нюжӧдӧ льӧм.
Сылӧн ведраас йӧв — медся быгъя,
Медся сук — койӧ сливкалысь рӧм.

— Тоня миянӧс бара и панйис!
Кытысь вын тэнад сэтшӧм да сям?
Али гумлалан йӧвсӧ тэ тшанысь,
Кӧн йӧв мореыс некор оз ям?

Тоня сералӧ: — Мӧсъясным ӧткодь,
Ставлӧн асланым, емваса рӧд.
Йӧвлӧн мореыс удж бӧрся вӧтчӧ,
Ме секрет сэсся мӧдӧс ог тӧд. — 

Аньяс шензьӧны: — Стройнӧй да мича,
Вот и мӧсъясыс сетӧны йӧв!
Мича ань вылӧ коді оз видзӧд?
Быдӧн син бӧжсӧ кӧвнитлӧ чӧв.

Кодкӧ вом тырнас сералӧ: — Сӧрӧм!
Чужӧм мичысь эз юлыны ва.
Мортлӧн мичлуныс — сылӧн бур сьӧлӧм,
Вӧчан удж — сэтчӧ пукты душа.

Вот и видзӧдӧй дӧзьӧрсӧ сылысь,
Тӧлын, гожӧмын, тулыс и ар.
Сетӧ сьӧлӧмсӧ скӧтыслы. Збыльысь!
Вот и йӧлыслӧн сёрниыс гар. — 

И дояркаяс асланыс уджысь
Уна воясся корсьӧны грек.
Коді аддзас да веськӧдны кужас,
Сувтас Тонякӧд ӧтрадӧ сэк.

Кисьтӧ зэр либӧ омлялӧ бушков — 
Син ни пель! Но том аньлы дзик весь — 
Индӧм кадыслысь визь ньӧти вуджтӧг
Мунӧ фермаӧ: удж — сылы честь.

Мунӧ медводзын — асыв кодь мича,
Мунӧ стройнӧй зэв, — кыдз сьыланкыв.
Сылысь воськовсӧ нэмтӧ кӧть видзӧд,
Кыдз нӧ сьӧлӧмнад мичсӧ он кыв!

Аньлы ӧвтчӧны топольяс, кыдзьяс,
Лым кодь дзоридзсӧ нюжӧдӧ льӧм.
Сылӧн ведраын йӧв — медся быгъя,
Медся сук — койӧ сливкалысь рӧм!