* * *

Тӧлын озыр ме лымъя эрдъясӧн,
Кӧні рытгорув кӧин омлявлӧ.
Нимкодь сьӧлӧмлы, кодыр керкаын
Пескӧн ломтан да пачыд онялӧ.

Югыд шондіӧн озыр тулысын,
Кодыр пос помӧдз ойдлӧ ытваыс,
Кодыр окота пӧся кутлыны
Дзоридз вом дора сьылысь рытъяссӧ.

Гыма зэръясӧн озыр гожӧмнас,
Кодыр сыркмунлӧ ловъя вӧр-ваыс,
Кодыр чардбиыс уна вожъясӧн
Пемыд енэжсӧ вундӧ-шӧралӧ.

Тшакӧн-вотӧсӧн арнас озыр ме,
Абу скуп миян войвыв парманым.
Сэсся вой тӧлыс аслас моздорын
Ваяс шлякасӧ кыськӧ бара на.

Талун озыр ме коми кывнаным,
Кодӧн сёрнитліс пӧльлӧн пӧльыс на..
Нӧшта ошйыся ставлы кывмӧнъя:
Тшӧтш и озыр ме аслам гӧльлунӧн.