ТЭКӦД МЕ...

Наташалы              

Тэкӧд ме — гӧрд розъя пелысь,
Тэтӧг ме — вотӧстӧм яг.
Тэкӧд ме — кык лопта пелыс,
Тэтӧг — ю визулын чаг.

Тэкӧд ме — тӧвся вой кыа,
Тэтӧг ме — кодзувтӧм вой.
Тэкӧд ме — Эжва выв гыяс,
Тэтӧг ме — йинёньысь войт.

Тэкӧд ме — сялькӧдчысь тулыс,
Тэтӧг ме — пакталӧм шор.
Тэ меным медся на муса,
Му вылас меддонатор.

Тэкӧд ме — лэбач моз сьыла,
Сы моз жӧ шевкйӧдла борд,
Сэки мен нюмъялӧ ывла,
Сэки ме пӧт, тшӧтш и код.

Тэкӧд ме — чардбиа гожӧм,
Тэтӧг ме — кисьмытӧм оз.
Тэкӧд ме — шувгысь ён пожӧм,
Тэтӧг ме — ӧтка дзор коз.