ТЭ КӦ РАДЕЙТАН

Тэ кӧ радейтан ас чужан му,
Дзоридз вылысь тэ лысва он уськӧд
И он керав тшук вежӧдысь пу, — 
Сетан быдмыны паськыд веж кустӧдз.

Тэ кӧ радейтан ас чужан му,
То став югыдсӧ, мичасӧ быдтан,
Видзан, медым эз сот кӧдзыд ру.
Мед эз чирышт нем виччысьтӧг кыткӧ.

Тэ кӧ радейтан ас чужан му,
Ассьыд юястӧ сӧстӧма видзан,
Гӧра горулад луп-лӧп он ну.
И он валит, мый лёк, абу мича.

Тэ кӧ радейтан ас чужан му,
Сэк он сувт воӧм гӧсть дорысь сайӧ,
Гортад пыртӧдан: «Сёй тэ да ю!» — 
Медбур сёянтӧ сылы тэ ваян.

Тэ кӧ радейтан ас чужан му,
Сідзкӧ, бать-мамтӧ донъявны кужан,
Кӧсъян аслыд и йӧзыслы шуд,
Коді сӧмын бур сьӧлӧмын чужӧ.