СТУДЕНТАЛӦМ В. М. ПальшинлыТехникумӧ ми быдӧн Воим — мырдорса челядь. Эгӧ торъявлӧй гыдйӧн, Кӧть и збоявлім веля. Быдӧн ӧтлаын олім Ӧти дружнӧй семьяӧн. А кор классъясысь волім, Рушку зэлӧдлім Сола няньӧн да ваӧн. Воам, кватитам чайник, Ваям пӧсь ва титанысь. Сійӧс дучитам ставным, Ньылӧм чышкаліг банысь. Рушку... Шыльӧдам сійӧс: — Пӧтшва, перед ни кӧті, Сэтчӧдз зэлӧдіс йиӧс! — Быдса во кежлӧ пӧті!... — Ю на, ю, — шуам ёртлы, — Киссьӧ дон босьттӧг ваыс, Оз ков базарысь босьтны. Аттьӧ сылы кӧть таысь! — Эськӧ юи, — ёрт шуас, — Сӧмын тасмаӧй орӧ. Омӧль моржлӧн жеб куысь Кодкӧ вӧчлӧма, морӧс! — Кӧть и нянь норма сёйим Быдса сизим лун водзӧ, Юр ог ӧшӧдӧй — збойӧсь, Быдӧн ас шудӧн кодӧсь. Муртса шойччам и бара «Йирам» ассьыным книга. Некод шоглун оз гарав, Сійӧс пыдын ми видзам. Глава лыддям и шуам: — Нолтӧ висьтав жӧ, вокӧй: Кыдзи ва, кодӧс юам, Лоӧ химия ногӧн? — Аш-два-о, дона пиӧй, Аш-два-о сійӧ лоӧ. Он кӧ тӧд, то ме сиа Тӧдны тэн. Гӧгӧрвоан? — Молодеч! Тэ нин химик, Мыйӧн батьыд эз вӧвлыв. Кодыр воӧн, сэк, пиук, Гортад шызьылас чӧвлун. Вот пӧ пи менам кутшӧм, — Кутас шензьыны батьыд, — Юрас сэтшӧмтор кутӧ, Мый эг тӧдлыв ме ачым! Весиг ва аш-два-оӧн Академик моз шуӧ! Сідзкӧ, чужлӧм бур воӧ, Ыджыд вежӧрӧн туӧм. Гиж письмӧ, мый ми сёям Нянь тан хлористӧй натрӧн, Аш-два-о сэсся юам, И юр кутам век чатӧр! И письмӧ батьыс лыддьӧ, Ассьыс дорлӧдлӧ юрсӧ: — А эг пуктыв ӧд пыдди, Кодыр пырис сы курсӧ! Ӧні, видзӧд жӧ, сійӧ Кутшӧм сёянъяс сёйӧ! Аш-два-о — сійӧ штука, — Кутшӧм сёйлім ми воӧ?!
