СТЕПАН ПЕРЫМСКӦЙ ЙЫЛЫСЬ

Коркӧ Степан Перымскӧйыд из пур вылын мӧдӧдчӧма кывтны Емва кузя. Емва йылас кайлӧма пыртавны. Кодӧс вермӧма пыртны — пыртчис, а коді и вӧйтчис чудь гуясӧ.

Серегов вылысын Кошка, либӧ комиӧн кӧ Кось, деревня весьтын выйим порог, зэв ыджыд, веськыда бузгӧ ваыс, пуӧ. Степаныд и горӧдас:

— Шылясь, порог!

Порогыд эз ло, молялі.

А косьсаяс вӧлӧм эльтӧны Степантӧ:

— Степанӧ, Степанӧ, ур яйтӧ бара сёйим ӧд!

— А нэмнытӧ ур яй сёйны тіянлы инӧ, а ляльсаяслы кока туисӧн ветлавны!

Степаныд воас сэсся Емдінӧ. А сэні вӧлӧма зэв ыджыд кыдз, молитчылӧмаӧсь сійӧлы йӧзыд. Степаныд тшӧктас пӧрӧдны кыдзтӧ.

Ӧти лун кераласны, кераласны да оз пӧр. Вой узясны, мӧд асыв видзӧдӧны да кыддзыс важ кодь ён. Мӧд лун бара кераласны, кераласны, бара войнад важ кодь лоӧ. Коймӧд лун Степаныд тшӧктас дугдытӧг керавны лунтыр дай войбыд. Кыддзыд и упкысяс-пӧрӧ. Йывсяньыс пӧ сэки кутас лэччыны шыр да дзодзув, зэв уна. Степан тшӧктас весьсӧ биӧ чышкыны.

Сэсся кыдз местаӧ собор стрӧитасны.