* * *

Сьӧлӧмӧй менам, ичӧтик ёкмыльтор морӧс кудйын. Ставсӧ тай тэ аддзан и кылан, ставсӧ тӧдан и гӧгӧрвоан — шогӧ усьлан и радлан, нюмъялан и бӧрдан, гажтӧмтчан и поткӧдысь дойысла горзан. Мыйта кывбур нин ме ставтор йывсьыс гижи, а тэ йылысь — ни ӧтиӧс эг. Ог куж ме висьтавны тэнсьыд шогсьӧмтӧ да нимкодясьӧмтӧ, ог вермы восьтны пыдӧстӧм гуся мӧвптӧ.

А, колӧкӧ, став кывбурӧй менам сӧмын тэ йылысь и эм? И тайӧ, пусьыс орӧм, му вылас гылалысь медбӧръя корйыс, и тувсовъя лым увсьыс писькӧдчысь медводдза дзоридзыс, и гожся зэрыслӧн енэжсьыс войталысь ваыс — тайӧ тэ, менам сьӧлӧмӧй...