СЬӦКЫД ОВНЫ ШЫ НИ ТӦВ


Бабӧ миян вылӧ ропкӧ:
Кӧть пӧ пеляд вата сюй.
Кӧть пӧ керка ӧдзӧс клопкы,
Шумсьыс аддзан пышъян туй.
А ми шумсӧ огӧ кылӧй,
Быттьӧ гортын шы ни тӧв.
Ме со кайи улӧс вылӧ,
Лои сійӧ удал вӧв.
Вокӧй воча меным рӧдтӧ.
Паныдасим ныр на ныр.
Ваксим-сералім ми пӧттӧдз,
Радлун миян шердын тыр.
Сувтіс вокӧй кок пӧв йылӧ.
Шуӧ: ме пӧ циркач стӧч.
Йӧктыштігмоз весиг сьылӧ,
Кужан кӧ пӧ, тадз жӧ вӧч.
И ме сувтны сы моз кӧсйи.
Видзӧд мися артмас вот.
Но сэк кыдз тай лёкысь несйи,
Улӧс вывсянь уси — шмот.
Луддзис менам ӧтар бокӧй.
Чужӧм пыр жӧ лои руш.
Серам вылӧ лэптіс вокӧй,
Немтор вӧчны пӧ он куж.
Шуа веськыда, ог пӧръяв,
Синва петіс шорӧн нач.
Бабӧ локтіс зэв кузь ньӧръя,
Воклы бокас шлуч да шлач.
Со пӧ лекарствоыс кӧні,
Он кӧ кылӧй менсьым кыв.
Керка пытшным лӧнис ӧні.
Ме ог бӧрд нин, вок оз сьыв.
Сӧмын дыр-ӧ лоӧ чӧв?
Сьӧкыд овны шы ни тӧв.