* * *

Мамӧлы Анастасия Ивановналы

Со и отпуск. Кокын керза сапӧг.
Юрын шляпа. Вылын болонь плащ.
Нопйын шоныд чышъян, банйӧм яблӧг —
Мамлы гӧснеч. Мамысь бырис гаж.

Часӧн воа Сыктывкарсянь...сэтчӧ,
Шыбӧльястӧм во чӧж сынӧд туй.
Кымын матын — сьӧлӧм ёнджык чеччӧ,
Шӧвк лентаӧн ӧвтчӧ Эжва ю.

Со и клуб. А со и мамлӧн керка,
Ӧшинь улас быдмӧгъяса йӧр.
Ваньӧ воклӧн понйыс сэн жӧ эргӧ:
Дыр эг вӧв да — сы вӧсна и скӧр.

Ачыс мамӧ воча меным петӧ —
Му вылас мен медся мича ань.
Меліника топӧдла ас бердӧ,
Му вылас код меным медся шань.

Еджыд быгйӧн пуӧ чужъя сурыс,
Вӧлӧгаӧн пызан вылыс тыр:
Видзӧда да тайӧ здукас муртса
Керкаӧдзыс град йӧрнас эз пырт.

Лӧсьӧдыштіс баба юрсьыс кӧртӧд,
Пуксис воча. Сёрни, майбыр, эм.
Нимкодьысла сьӧлӧмыс кыдз бӧрдӧ —
Кыла ӧтнам. Кыла сӧмын ме.