СИКӦТШЪЯСА АСЫВ
Войвылад тшӧкыда вильшасьлывлӧ арся поводдяыс. То лым петалас, то лунтыр куражитчас-зэрас. Сёр арнад мича лунъясыд ок кутшӧм гежӧда овлӧны.
Талун со бара мыйыськӧ енэжыс бӧрдӧ, некыдз оз вермы косӧдны синвасӧ, кисьтӧ и кисьтӧ пыдӧдз кӧтасьӧм му вылӧ, шоръяслы тшӧктӧ лоны варовджыкӧн.
Быд тӧв пӧльыштӧмысь град йӧрын копрасисны медбӧръя арся дзоридзьяс, кодъясӧс абу на вермӧма кусыньтны кӧдзыдыс. Коръя пуяс вылын дыр зэрӧмсьыс ӧшалісны ва больяс. Ӧтияс на пиысь регыд и потласисны, мӧдъяс эз кӧсйыны сетчыны, зілисны кыдз позьӧ дырджык ӧшавны пу вожъяс вылын.
Букыш поводдяыс кадысь водз плавкнитіс ассьыс шебрассӧ вӧр-ва вылӧ, дзебис найӧс асылӧдз. Важ моз дугдывтӧг зэрис. Сӧмын сап пемыднас нин сикт весьтысь весасисны кымӧръяс, енэжын ӧти бӧрся мӧд петкӧдчисны чусмӧм кодзувъяс. Ывлаын лои пыр жӧ кӧдзыдджык. Асыв тӧв пыдди мӧдіс пушкыны вынйӧра вой тӧв.
Тамара, мыйӧн садьмис асывнас, видзӧдліс ӧшиньӧдыс град йӧрас и радысла мӧдіс кекӧначасьны, чукӧстіс мамсӧ да чойсӧ:
— Мамук! Настук! Волӧй, видзӧдлӧй, мый вӧчсьӧ ывлаас!
— Мый сэтшӧмсӧ аддзин? — юаліс мамыс.
— Волӧй да асьныд аддзанныд.
— Абу миян кадыс: удж вылӧ колӧ мунны.
— Но, зарни чоюк, видзӧдлы.
Настук локтіс ӧшинь дорӧ, видзӧдліс гӧгӧр, немтор шензянаторсӧ эз аддзы.
— Висьтав, кутшӧм дивӧ аддзин, Тома?
— А тэ видзӧдлы бурджыка, — вочавидзис Настуклы ичӧтджык чойыс. — Аддзан пуяссӧ? Мый сэні ӧшалӧ? Тайӧ асылыс ывласӧ гажӧдӧма, быд пу вылӧ сикӧтшъяс ӧшлӧма. Чукӧртны кӧ найӧс, кымын нывкаӧс позьӧ вӧччӧдны.
Школаас мунігӧн Тамара кежавліс град йӧрас, вель дыр сулаліс кыдз пуяс дорын. Кутшӧм уна сикӧтш моль ӧшаліс пу вожъяс вылын, кодъяскӧ быттьӧ найӧс татчӧ войбыд ӧшлӧмаӧсь.
Школа дорын Тамараӧс суӧдіс пӧдругаыс.
— Ой, Люда, мый ме талун аддзылі!
— Висьтав, да кута тӧдны.
— Сикӧтшъяса асыв, со мый. Татшӧм мичлунсӧ ме некор на эг аддзыв. Помасясны урокъяс да ветлам видзӧдлыны.
— Сӧмын эн ылӧдлы.
Кор триньӧбтіс медбӧръя звӧнок, Тамара да Люда мунісны видзӧдны сикӧтшъяса пуяс. Кор воисны Тамара керка дорӧ, нывкаяс гӧгӧрвотӧма видзӧдлісны ӧта-мӧд вылас. Кымынкӧ часӧн став мичлуныс вошӧма, кӧть и Тамара аслас синъясӧн аддзыліс сикӧтш мольясӧн вӧччӧм асывсӧ.
Ӧбиднӧ вӧлі, мый Люда пӧдругаыс вермас не эскыны сылы.
