ШОНЫД САРИДЗ ДОРЫН


Некӧн тӧвру абу выйӧдз,
Саридз вылас лӧньсьыс-лӧнь.
Сэні оз ветлыны гыяс...
Быттьӧ узьӧ гӧгӧр скӧнь.

Кутшӧм шоныд асыв талун!
Ывла вылыс мелі, бур.
Саридз сайсянь шонді, алӧй,
Мыччис ассьыс зарни юр.

Гӧгӧр сявкйӧ дзирыд югӧр.
Рӧмпӧштан кодь море выв.
Мичлун сьӧлӧмӧдз тэд тшукӧ,
Чепӧсйӧ сэсь сьыланкыв:

«Шоныд асыв, гажа асыв!
Мойданкыв кодь море дор!
Нимкодяся енэж пасӧн,
Дзик ме некодӧс ог ёр».