* * *

Помӧсдін вожысь
Бадьёльйыв сиктса дӧваяслы


Шондіыскӧд чеччис Марья тьӧтӧ:
Верӧсыслӧн талун чужан лун.
Рытбыд кевмис — волы пӧ кӧть вӧтӧн,
Сӧмын ылӧ пышйис пӧрысь ун.

Горсъя пачын банйӧ небыд шаньга,
Пызан вылын верӧслӧн портрет:
Гӧтырланьыс видзӧдӧ со Ваньӧ,
Видзӧдӧ, но гӧлӧссӧ оз сет.

Шыльӧдыштӧ Марья сылысь юрси,
Малалӧ чунь помнас ныр и вом.
Ылі муын кодыр сійӧ усис,
Вӧлі сэки комын арысь том.

Марья тьӧтлӧн доршасьӧ кос синва,
Кольӧм кадыс чужтӧ уна дум...
Верӧссӧ пыр малалыштӧ кинас —
Виччысьӧ, кор петас сылӧн нюм.