СЕМЕН

Выль йӧз шпыннявлісны, кор аддзывлісны Семенӧс, либӧ ӧдйӧджык ордйывлісны сійӧс. Кодлыкӧ и мог эз вӧв: этша али мый йӧйыс свет вылад? Да и Семен торъя йӧзлань эз сибӧдчы, посёлокса понъяс моз юрсӧ ӧшӧдӧмӧн лунтыръясӧн тапъяліс ас кежас. Кадысь кадӧ мыйкӧ нурбыльтліс да кинас шеныштліс. Лёзь юрсиа, гез помӧн кӧртыштӧм гача, лым сылӧмсянь выль лымйӧдз ветлӧдліс кӧмтӧг-пасьтӧг. Тӧвнас куш яй вылас пасьтавліс кизьястӧм турунвиж ной куртка да тшайподасьліс резина сапӧгӧн. Йӧз первойсӧ жаляддза сетлісны гын сапӧг да бурджык паськӧм, но вина стопка кӧ веськавліс вомас, Семен шыблавліс вылыссьыс ставсӧ да бара кольліс гач кежсьыс.

Быд асыв удж вылӧ моз, стӧч сизим часын, воліс Семен аэропортӧ. Паныдавліс да коллявліс став самолётсӧ. Стӧч дас кык часын матыстчывліс буфет дорӧ. Индывліс чуньнас булки да кофе стӧкан вылӧ: «Эдэс, эдэс». Кыскывліс зепсьыс мелоч да, буфетчица вылӧ гуга синнас видзӧдӧмӧн, ӧтикаӧн сеталіс деньгасӧ, кытчӧдз мӧдыс эз шулы: «Тырмас». Вештысьліс кӧ ыргӧн деньгаӧн, нурбыльтліс: «Даан уна буфтан», мый вылӧ буфетчица шуліс шмонитӧмӧн: «Дерт, уна босьта, талун чӧскыд да...» «А-а»,— нюжӧдліс Семен, вешйывліс бокӧ, гораа ырскӧмӧн юліс кофесӧ да бӧр мунліс «удж вылас». Кӧдзыд лунъясӧ, кор самолётъяс эз лэбавны, Семен аэропортысь эз петавлы. Сапӧгъяссӧ пуктывліс юр улас да броткӧдчӧмӧн водліс батарея бокӧ. Сідз и узьліс лунтыр. Рытланьыс босьтліс сапӧгъяссӧ киняулас да гӧгрӧс подъя кокъяснас видзчысьӧмӧн, быттьӧ изъяс вывті, восьлавліс гортас.

Коркӧ татшӧм лунӧ жӧ Семен пукаліс джоджас, батарея бокын. Матыстчис ар кыка нывка. Дыр видзӧдіс Семен вылӧ, сэсся бергӧдчис мамыслань: «Мыля нӧ дядяысь кӧмтем?» «Лок татчӧ»,— яндысьӧмӧн гӧгӧр видзӧдліс мамыс: эз-ӧ казяв кодкӧ. «А мыля дядяысь кӧмтем?» — «Лок, эн юась нинӧм абусӧ», — дзикӧдз нин яналӧм мамыс гораа шӧпнитіс нылыслы. Ныв, тыдалӧ, гӧгӧрвоис, мый мамсянь вочакыв оз ло, да матыстчис Семен дорӧ. «Дядя, те не мыля кӧмтем?» Семенлы любӧ лои, мый кодкӧ сы дорӧ шыӧдчис, да ещӧ и дядяӧн ыдждӧдліс. «Да, дяга. Гхы!» — «Кокеньыдь кыммась. Те мыля, дядя, кӧмтем?» — «Гхы! — серӧктіс Семен да юрнас довкнитіс,— ме дяга». Нывка гӧгӧрвоис, мый и дядьӧыскӧд сёрни эз артмы. Кутчысьліс Семенлы кӧмтӧм кокас, юрсӧ сюйліс пельпомас: «Кӧдиидь...» «Да, ме дяга», — читкыртчывліс долыдысла Семен. Нывка пуксис джоджӧ да ружтӧмӧн кутіс кыскыны коксьыс буркисӧ.