РАКАЯС
Ӧтчыд, шойччан лунӧ, Миша да Ваня кайисны керӧсӧ тшак вотны.
Зэрышталӧм бӧрын петалӧма виж да гӧрд гоб, а туй пӧлӧн масленик мыччысьӧма.
Сьӧрсьыс налӧн Буско пон. Гожӧмбыд дом йылын сійӧ олӧ. Вотчигкості мед ризъялас-котралас. Бусколы нёль тӧлысь на. Пыр вильшасьны зэвтчӧ. Ёна ышмас вӧлі да, пӧчӧсянь сылы корӧсьӧн сюрлывліс. А сэсся лук град таляліс да, таысь гожӧм кежлӧ чеп йылӧ веськаліс.
Вӧрын Буско пуяс костӧд тювкъяліс. Увтыштас, исыштас да бара ризӧдӧ. А Миша да Ваня тапикасьӧны надзӧн. Пыдӧдз вӧрас оз пырны, вошӧмысь полӧны. Но нинӧм, ортсыас эм жӧ тшакыс. Чуманъясыс тырны кутісны. Кӧсйӧны нин вӧлі гортас мӧдӧдчыны, но падмисны. Козъяс пӧвстын кутіс кывны Бусколӧн лёкысь увтчӧм.
Миша шуӧ:
— Ошкӧд али мый паныдасис?
— Ошкӧд? — повзьӧмпырысь артмис Ванялӧн. Весиг кокъясыс сылӧн лигишмунісны.
— А мыйла либӧ ошкыс оз мурӧстлы? - недыр кывзысьыштӧм бӧрын бара шыасис Ваня. - Со, ракаяс сӧмын кравзӧны.
— Ракаяс кравзӧны сэк, кор кодкӧ локтӧ. Тыдалӧ, ошкыс локтӧ. Бускоыд повзьӧдлӧ сійӧс, — кинас шенасьӧмӧн висьтасис Миша.
Ваня шутёвтӧмӧн корис понсӧ, но сійӧ эз лок. Сӧмын ёнджыка кутіс увтны, а сэсся кыліс лёкысь никӧстӧм.
Зонкаяс кватитісны, мый сюри ки уланыс, уськӧдчисны Бускоӧс дорйыны. Та дырйи ош йывсьыс сёрниыс юрсьыныс пыр жӧ воши.
Кутшӧма жӧ зонкаяс чуймисны, кор ичӧтик кушинын аддзисны понсӧ. Бӧжсӧ лэдзӧма, тявзӧ, а ныр улас чеччалӧ рака. Бордсӧ шевгӧдӧма, вомсӧ паськӧдӧма, метитӧ кокыштны Бусколы веськыда нырас. Да-й, тыдалӧ, кокыштлӧма нин. Прӧстӧ ӧмӧй понйыс никӧстіс.
Мыш саяс кравзіс ракапи:
— Карр-карр.
Чирӧм гӧлӧснас тшӧтш повзьӧдліс понйӧс. Буракӧ, ракапиыс шедлӧма Бусколы вомас. Со кыдз шуйга бордсӧ кыскӧ муӧдыс.
Тайӧс аддзӧм бӧрын зонкаяс джӧм сувтісны. А рака мамыс казяліс найӧс, мый вынсьыс ырыштчис да кыдз тай кокыштас Бусколы нырас!
Буско лёкысь никсігтырйи ӧдӧбтіс пышйыны. Зонкаяс дорӧ весиг эз матыстчыв. А рака мам кравзігтырйи нуӧдіс писӧ бокӧ.
Миша да Ваня видзӧдлісны ӧта-мӧд выланыс да вак-вакӧн серамныс петіс. Шыбитісны пу паличьяснысӧ да шутьлялігтырйи мӧдісны гортаныс.
Чайтісны, Буско кӧнкӧ матын. Но весьшӧрӧ сійӧс корисны. Воисны гортас да аддзисны понсӧ.
Буско пырӧма аслас чомйӧ, сӧмын нырыс тыдыштӧ. Мыжа синъясӧн видзӧдӧ зонкаяс вылӧ.
— Эк тэ, йӧюк, — домалігас шуис Миша.
А Ваня малыштіс понйӧс нырӧдыс, кытчӧ ракаыс кокыштіс.
