ПЫЖЫН


Шонді жарсӧ солькйӧдлӧны джыджъяс,
Жбыръялӧны миян весьтын дзик.
Гӧтырӧйкӧд кывтам ветки пыжын.
Али ачыс катӧ чужан сикт?

Шыльыд видзьяс шевкнитӧмны сывсӧ,
Кӧвдум кодьӧсь турун юръяс со.
Орччӧн кыдзьяс — быттьӧ мудзӧм нывъяс
Куртӧм бӧрын кокньӧдӧны лов.

Налы шонді кыӧ зарни кӧса,
Морӧснысӧ ыркӧдыштӧ тӧв.
Налы енэж койӧ югыд лӧзсӧ,
Эжва юыс на водзын со шӧвк.

Лэбач тивзӧм сьӧлӧманым сидзӧ,
Гӧгӧр ворсӧ гожӧмыслӧн нюм.
Венеч улӧ сувтӧм ныв кодь мича
Берегсяньыс ӧвтчӧ чужан му.

Ӧвтчӧ-сьылӧ быттьӧкӧ жар-птица,
А ме быттьӧ лыддя-кывза мойд,
Кӧн ме — сар, а гӧтырӧй — саритса,
И кӧн лӧжыс абу весиг войт.