ПОСЁЛОКСА НЫВКА

Посёлок весьтын, кӧні олӧ Полина, эм неыджыд куръя. Сійӧ абу ыджыд, а чериа. Куръя берегас сулалӧ мастерскӧй. Тӧвнас сэні катеръяс дзоньталӧны.

Чери кыйны радейтысьяс тшӧкыда волывлӧны татчӧ. Торъя уна йӧзӧс позьӧ аддзывны шойччан лунъясӧ. Буръясӧн да пыридзьясӧн лунтырнад кымын розь вӧчасны йиас, думнаныс пыр корсьӧны, кытысь позьӧ кыйны унджык кельчиясӧс, ёкышъясӧс, йӧршъясӧс.

Чери кыйны локтӧны карса войтыр и матігӧгӧрса посёлокъясын олысьяс. Татысь позьӧ аддзыны олӧма мужичӧйясӧс, зонъясӧс и велӧдчысьясӧс. Ӧткымынъяс йи сувтӧм бӧрын уна во нин кыйсьӧны тані, тӧдсаӧсь ӧта-мӧдныскӧд.

Вӧскресенньӧӧ да каникулъяс дырйи тайӧ гӧгрӧс куръя вывсьыс, коді йитчӧма Сьӧрт полой юкӧд, тшӧкыда позьӧ вӧлі аддзывны ар дас кыка ичӧтик тушаа нывкаӧс.

Чери кыйысьяс пиысь кодкӧ аддзас джуджыд кыр йывсянь лэччысь нывкаӧс да ставлы кывмӧн горӧдас:

— Поля локтӧ! Эн шогсьӧй: чериыд кутас шедны. Кор сійӧ тані, ме некор гортӧ черитӧг ог бергӧдчыв.

Полина матыстчӧ и матыстчӧ куръя дорӧ. Дженьыдик пальтоа, шапкаа, кокас колоша сьӧд гынкӧм, ӧти киас кутӧ портфель, мӧдас — кутшӧмкӧ тубрас.

— Талун тай дыр узьӧмыд, нывка, — шыасис кодкӧ сы дорӧ.

— Эг эськӧ узь да, урокъясӧс велӧді. Да и ӧні водзсӧ нинӧмла локны: чериыд рытъявылыс бурджыка босьтӧ.

— Оз шед да, ме вӧлі кӧсъя гортӧ нин довгыны. Сідзкӧ, рытӧдзыс ковмас на кольччывны, — збыль вылӧ вочавидзис мӧд чери кыйысь.

Нывка оз тэрмась кыйсьыны пуксьыны, матыстчылас быд кыйсьысь дорӧ, видзӧдлас, кодлы уна-ӧ чериыс шедӧма. И сӧмын сы бӧрын мунас аслас местаӧ, кӧні пырджык пукавлӧ.

— Дӧбгӧ оз кӧть? — юаліс сійӧ гӧрдӧдӧм чужӧма олӧма мортлысь.

— Эн нин юась. Квайт час асывсянь кык кельчи шеді да чунь кузя йӧрш, — норасис мужичӧй.

— Шедны на кутас. Эн шогсьы, — такӧдіс шогӧ усьӧм мортӧс нывка, а ачыс бара нин восьлаліс мукӧд кыйсьысьяслань.

Сувтіс ӧти лунка дорӧ, кӧні пукаліс томиник зон, видзӧдліс вугыр шайт вылас и дивитана шуис:

— Но и пробка кӧрталӧмыд, чериыс сійӧс вӧрзьӧдныс оз вермы. Колӧ ичӧт пробка пуктыны да вугыр шайт помад кивок лӧсьӧдны. И эн вуграв кыйсигад, а тшӧкыдджыка вӧрӧд шатинтӧ.

— Кытысь тэ усин татшӧм велӧдысьыс? — скӧра вомаліс нывкаӧс том зон.

— Ог велӧд, а висьтала.

— Бабыдлы висьтав. Ачыд, тӧдӧмысь, ӧти чери на аслад киӧн эн кыйлы.

— Тэ, Петрован, прӧста тадзи шуасян Полина вылас. Сійӧс ме унаысь нин аддзылі татысь. Чериыд сылы, майбыр, шедӧ — Сэсся шыасис нывка дінӧ: — Полинушка, ас местаад бара пуксян? Кокниа пасьтасьӧмыд да эн кӧть кынмы.

— Ог кынмы, Семен дядь, ме сьӧрысь целлофанӧвӧй палатка вӧдита. Пыран сы пытшкӧ да керкаын кодь шоныд.

— Кор изӧймита, шонтысьны, сідзкӧ, вола, — гӧлчитіс том зон.

— Он тӧр, ӧтнам вылӧ сійӧс лӧсьӧдӧма, — вочавидзис Полина.

Семен дядь босьтіс бур да шыасис нывка дорӧ:

— Лок, петкӧдлы, кытчӧджык писькӧдны розьсӧ.

Полинаӧн индӧм местаӧ чери кыйысь лэчыд бурнас ӧти здукӧн и вӧчис йи вылӧ кык неыджыд розь, отсаліс нывкалы зэвтны палаткасӧ, мыччис неыджыд пес чурка.

— Тайӧ тэныд улӧс пыдди. Но, бура кыйсьыны, Полинушка.

— Аттьӧ, Семен дядь. И тэныд мед уна чери шедас.

— Сӧстӧм сынӧднас позяс пӧттӧдз лолавны и то бур. Черитӧ кыйны сюсьлун колӧ.

Мыччысис шонді, йи вылын куйлысь южмӧм лымйыс лои мичаджык. Полина пукаліс палатка пытшкын да синъяссӧ эз вештыв ичӧтик гӧрд пробкаяс вылысь. Вель тшӧкыда черияслы лэдзліс лункаас курччалӧм нянь, дугдывтӧг ворсӧдчис вугыр шайтнас. Шеді медводдза кельчи, сэсся мӧд, коймӧд. Вель ыджыд ляпаӧс лэптіс.

Недыр кежлӧ черияс дугдывлісны сёйны, сэсся мыйкӧ дыра мысти кодкӧ бара мӧдіс вӧрӧдны пробкасӧ. Полина тӧдӧ, кор позьӧ лэптыны: эз этшаысь нин кыйсьывлы.

Час кык мысти, кор шонді бӧр дзебсис кымӧръяс сайӧ, Полина палатка дорӧ матыстчис том зон Петя. Видзӧдліс йи вылын чеччалысь черияс вылӧ да ачыс эз тӧдлы, кыдзи горӧдіс:

— Ёртъяс! Волӧй, видзӧдлӧй, мый тані вӧчсьӧ. Гашкӧ, комын чери нин лэптӧма.

Чери кыйысьяс пиысь унаӧн чукӧртчисны шуда кыйсьысь дорӧ.

— Но и но... Еретнича кӧ тэ, ныланӧй-а. Миянлы тай нӧ нинӧм оз шед, — дивуйтчисны ӧткымынъяс.

— Тӧдӧмысь, сійӧ молитва лыддьӧ чериясыслы. Вот и радейтӧны сійӧс, — шуасисны мӧдъяс.

А Полина тӧдӧ ассьыс удж: тэрыба вежлалӧ вугыръясысь самсӧ, дугдывтӧг вӧрӧдӧ вугыр шайтсӧ.

— Ме быдса час нин шатинӧс васьыс эг лэптыв. Муна да видла, колӧкӧ, ёді кутчысис, — шуыштіс том зон да котӧртіс аслас местаӧ.

— Меным ок ыджыд и чери кутчысьліс, да мыні, — шуис кодкӧ.

— Мынӧм чериыд пыр ыджыдӧн кажитчӧ, — нюмъёвтіс Полина да тэрыба лэптіс вель мича кельчи.

Пемдандорыс нин чери кыйысьяс ӧти бӧрся мӧд мӧдісны гортаныс. Разис ассьыс палаткасӧ и посёлокса нывка.

— Жаритмӧн кыйи. Талун кежлӧ тырмас сэсся, — шуыштіс Полина, кор сы дорӧ бара чукӧртчисны чери кыйысьяс морт дас.

— Да, ме дас воысь дырджык нин кыйся, но первойысь аддза, медым нывкалы меысь унджык кыйдӧс шедіс, — катлӧдліс юрсӧ Семен дядь. — Молодеч, Полина.

Векньыдик туйӧд ӧти бӧрся мӧд восьлалісны чери кыйысьяс. На бӧрвылын тэрмасьтӧг кайис джуджыд кыр йылӧ и посёлокса нывка.