ПӦЛАТЬСЯНЬ КРӦВАТЬӦ
Ми Агния пӧдругакӧд велӧдчим нин школаын, а вежӧрным чипанлӧн мында на и вӧлі. Унджык прӧст кадсӧ коллявлім миян керкаын. Чомйӧн ворсам, шердынӧн дадь пыдди кыскасям джоджӧд (важ керкаас краситтӧм вӧлі сійӧ). Пӧлать брусӧ ӧшӧдӧм гез качайын бовъялам...
И вот ӧтчыд мӧвпыштім пӧлатьсянь чеччавны крӧватьӧ. Первой чеччалім чойлӧн пружинаа кӧрт крӧватяс. Чеччыштан, да вылӧ качӧдлӧ, юр пыдӧсыд на пӧлатяд котшмунӧ. А орччӧн сулаліс пу крӧвать, пӧль на сійӧс вӧчлӧма. Шуим сэтчӧ видлыны чеччавны. (А узьлім тайӧ крӧватяс ми мамкӧд.) Эз и ковмы парашюттӧгыд дыр лэччыны. Ог нин помнит, кодлӧн гыпкысьӧмысь ратшмунісны пӧвъяссӧ кутысь утъясыс, и крӧвать пыдӧс лои джоджын гӧн вольпасьнас и юрлӧсъяснас. Повзим, дерт. Но мыж вӧчысь мортыд пыр корсьӧ петан туй. Корсим пӧвторъяс и чегӧминъяссӧ кӧрталім. Бӧр тэчим пӧвъяссӧ, вольпасьсӧ, эшкынсӧ и юрлӧсъяссӧ. Ыджыда лолыштны ог лысьтӧй, мед оз бӧр киссьы.
Пӧдругалы нӧ мый, муніс сэсся гортас. Со воис и мамӧ удж вылысь, сы бӧрся чой аслас бухгалтерскӧй тшӧтінас. Самӧвар пузьӧдісны. Пызан сайӧ пуксьӧм бӧрын куті ниртчыны чой дорӧ, мися, позьӧ ӧти вой кӧть узьны мамкӧд тэнад приданнӧй пружиннӧй крӧватяд. Ми ӧд, мися, ог ёна лайкмӧдӧй сійӧс. Каньги да каньги, весиг синва на пыдзырті.
Ладнӧ пӧ, сӧгласитчис чой и кайис клубӧ. А ми сэсся регыд и водім пружиннӧй крӧвать вылӧ. Мамӧ дзик пыр жӧ унмовсис мудзвывсьыд. Менӧ вугрӧдлӧ нин, но узьны ог лысьт — виччыся чойӧс клубысь. Кор сійӧ пырис гортӧ, кок шыяс сертиыс нин гӧгӧрвои, мыйкӧ сылы абу удайтчӧма. Пемыдас ид няньӧн и дзибыртіс йӧв кружка. «Казбек» папироссӧ на нёнялыштіс, пӧрччысис, и кыдз тай войся лӧняс гымыштіс, мамӧ весиг унйывсьыс чур-чермунлі. Мый пӧ нӧ, нылӧ, лои. А мӧдыс — воді пӧ тай со! Шойччы, шойччы пӧ, шуӧ мамӧ. Да-а, тані сӧмын и шойччыны.
А ме мамӧ мыш сайсянь кӧка: мися, петкӧд да шыбит сараяд, нэм помыс тайӧ пу крӧватьыслӧн воӧма. Сэсся и мамӧ дзикӧдз садьмис: лысьтлы пӧ сӧмын мӧссӧ да ыжъяссӧ шызьӧдны.
Асывнас ставыс тыдовтчис — чегӧмин пуыс эз вӧв сісь. Мӧдарӧ на, рысь кодь еджыд. А ӧшалісны сэні нырагез помъяс.
А батьӧлӧн важ тасмаыс йӧктіс менам бекъяс вылын сэтчӧдз, кытчӧдз мамӧлӧн киыс эз мудз.
