ПОДА ТУЙ

Бурӧн казьтышта Н. П. Поповӧс-Жугыльӧс

Быдсяма туйыс ӧд эм вӧльнӧй светад —
Паськыд и векньыд и, веськыд и чукыля.
Оз ставыс миянлы, гортсьыд кор петан,
Нимкодя, меліа дзирдав да югъяв.

Туй выйим, мӧвпъясыд чужӧны кытӧн,
Сувтӧны тэ водзын югъялан стенӧн,
Шӧрӧдзыс сьӧлӧмад пырӧны пыдӧ,
Тэнсьыд став вир-яйтӧ босьтӧны пленӧ.

Туй татшӧм векньыдик лоны ӧд вермас,
Но сійӧ яръюгыд, мича и сӧстӧм,
Шы ни тӧв ньӧжйӧник мунӧ, оз тэрмась,
Сьӧлӧмад кыпыда би киньтор ӧзтӧ.

Туй тайӧс некыдзи, некор он вунӧд,
Юр садьсьыд некытчӧ сійӧс он вешты
Некутшӧм сьӧд арся войӧ ни лунӧ,
Кытчӧдз оз сьӧлӧмлӧн тіпкӧмыс эшты.

Менам со Пода туй татшӧмыс вӧлі.
Туй тайӧ карланьӧ Кӧдзвывсянь муніс.
Эз позь сэт ветлыны телега-вӧлӧн...
Подӧнтӧ ветлысьыд вӧлі вель уна.

Чукыля-мукыля векньыдик туйыс
Эжа выв бор вылӧ вӧнь этшӧн водӧм.
Гӧгӧрын паськыдӧсь куйлӧны муяс.
Розъялӧ ид да сю. Гожся жар сотӧ.

Пуксям ми Жугылькӧд шойччыны борйӧ
Шыпича гу дорӧ веж эжа вылӧ,
Бобув кӧн лэбзьӧ да пуксьӧ быд корйӧ,
Чирк ассьыс сьылансӧ меліа сьылӧ.

Син водзын зэв джуджыд Прокоршор гуран,
Сы сайын неылын тыдалӧ карным,
Видзӧдӧ миянлань меліа, бура —
Быттьӧкӧ ставыс сэн эзысь да зарни.

Варовӧсь. Сёрнитам, кыдз эськӧ гижны
Комиӧн кывбуръяс, висьтъяс да мойдъяс,
Лыддьысьлы сьӧлӧмас кутас мед йиджны,
Мед эськӧ гижӧдным мичлунӧн ойдлас.

Сэки ӧд медводдза воськовъяс вӧчліс
Ас кывъя литератураыд миян,
Сэки поэзия муртса на кӧдзліс
Нэриник кӧйдыссӧ коми йӧз пиӧ —

Полігтыр бор кузя ньӧжйӧник муніс,
Туй вӧлі чукыля-мукыля, векни.
Туй вылӧ петіс ӧд шондіа лунӧ!
Коркӧ да сӧвмас на! — эскылім сэк ми.

Унаӧн миянлы мунісны паныд...
Сӧветскӧй власьт вылӧ кутім ми лача;
Веритім: чужан кыв комиын тані
Вынсялас, нюр вывсянь енэжлань качас!

Колины воясыд — ветымын саяс...
Коми кыв вель паськыд туй вылӧ петіс,
Вылӧ нин, нӧрысӧ, кыр йылӧ кайис,
Уна нин буртор да мичатор сетіс.

Мӧйму важ Пода туй корсьны ме петі...
Эз сюр ӧд весигтӧ муяс выв эрдыс.
Журкйӧдлӧ автобус матіті сэті,
Кыптӧма-сь керкаяс Прокоршор бердын.

Оз тыдав Прокоршор гуранлӧн кыркӧтш,
Оз лэччы морт ни лов сэті крут чойӧд.
Юр весьтын енэжын самолёт жбыргӧ,
Неылын грымӧдӧ-сыркӧдӧ поезд.

Оз пукав Пода туй бор вылын Жугыль,
Янсӧдчис миянкӧд нэм кежлӧ сійӧ...
Удж сылӧн, гижӧдыс — сӧстӧм и югыд —
Дыр кутас ветлыны коми йӧз пиын.

Ме тай со му вывті восьлала пыр на...
Ог тӧд, дерт, корджык да кутшӧмджык кадӧ
Сьӧлӧмлӧн тіпкӧмыс шуас мем: тырмас!
Дыркодь нин ола ме му вылас татӧн...